सवारी दुर्घटनामा एक वृद्धा घाइते

काठमाडौं– मकवानपुरगढी गाउँपालिका–५ सिमलटारमा आज बिहान भएको सवारी दुर्घटनामा एक जना ७३ वर्षीया वृद्धा घाइते भएकी छन्।

बिहान अन्दाजी ८ः३० बजे बासुदेव मार्ग हुँदै ज्यामिरे खोलाबाट हेटौंडातर्फ गइरहेको बा ५३ प २४१ नम्बरको मोटरसाइकलले बाटो क्रस गरिरहेकी सुकुमाया गोलेलाई ठक्कर दिएको हो।

दुर्घटनामा परि गोलेको टाउको र दाहिने हातमा चोट लागेको जिल्ला प्रहरी कार्यालय मकवानपुरले जानकारी दिएको छ।

घाइते वृद्धाको अवस्था मध्यम रहेको र हाल हेटौंडा अस्पतालमा उपचार भइरहेको छ। उनलाई उनका छोरा सुकुलाल गोलेले उपचारका लागि अस्पताल पुर्‍याएका थिए।

दुर्घटनापछि मोटरसाइकल चालकलाई प्रहरीले नियन्त्रणमा लिएको छ भने घटनासम्बन्धी थप अनुसन्धान भइरहेको प्रहरी स्रोतले जनाएको छ।