मंगलबार नेप्से र कारोबार रकम दुबै घट्यो

काठमाडौं– मंगलबार नेप्से परिसूचक घटेर बन्द भएको छ। कारोबार हुने साताको तेस्रो दिन नेप्से परिसूचक १९.४३ अंक घटेर २५२८.१६ विन्दुमा झरेको छ।

नेप्सेसँगै आज कारोबार रकम पनि घटेको छ। सोमबार करिब ५ अर्ब रुपैयाँको शेयर खरिदबिक्री भएको बजारमा आज ३ अर्ब ३६ करोड ६१ लाख ९८ हजार रुपैयाँबराबरको शेयर खरिदबिक्री भएको छ।

कारोबार रकमका आधारमा आज नेपाल पुनर्बीमा कम्पनी शीर्ष स्थानमा रहेको छ। सो कम्पनीको यस दिन ३२ करोड ७ लाख रुपैयाँबराबरको शेयर किनबेच भएको छ।

त्यसैगरी, हिमालयन रि इन्स्योरेन्सको १६ करोड रुपैयाँभन्दा बढीको शेयर कारोबार भएको छ भने सिईडिबी होल्डिङ्गस लिमिटेडको कारोबार रकम साढे १२ करोड रुपैयाँ नाघेको छ।

१३ उपसमूहमध्ये यस दिन ३ उपसमूहको परिसूचक बढेको छ भने १० उपसमूहको परिसूचक घटेको छ। विकास बैंक, वित्त, होटल तथा पर्यटन, जलविद्युत लगानी र निर्जीवन बीमा उपसमूहको परिसूचक १ प्रतिशतभन्दा बढी घटेको छ।

व्यापार उपसमूहको परिसूचक सर्वाधिक १.४८ प्रतिशत बढेको छ। त्यस्तै, अन्य र म्युचुअल फण्ड उपसमूहको परिसूचक सामान्य बढेको देखिन्छ ।