एनपीएल : लिग चरणको अन्तिम खेलमा जनकपुरविरुद्ध पहिले ब्याटिङ गर्दै कर्णाली

काठमाडौं– काठमाडौँमा जारी दोस्रो संस्करणको नेपाल प्रिमियर लिग (एनपीएल) अन्तर्गत आज लिग चरणको अन्तिम खेलमा आज कर्णालीले जनकपुरविरुद्ध पहिले ब्याटिङ गर्ने भएको छ ।

कीर्तिपुरस्थित त्रिभुवन विश्वविद्यालय अन्तरराष्ट्रिय क्रिकेट रङ्गशालामा जनकपुरले टस जितेर पहिले बलिङ गर्ने निर्णय गरेको हो । खेल नेपाली समय अनुसार ३ः३० बजे सुरु हुँदैछ ।

दुवै टोली एनपीएलको प्लेअफबाट बाहिरिसकेकाले यसले प्रतियोगितामा कुनै अर्थ राख्ने छैन । तर, दुबै टोली अन्तिम खेलमा जित निकाल्दै एनपीएफमा आफ्नो यात्रा सकारात्मक रुपमा टुंग्याउन चाहन्छन् ।

एनपीएलमा सुदूरपश्चिम रोयल्स र विराटनगर किंग्सले क्वालिफायर्स–१ खेल्दैछन् । उक्त खेलको विजेता टोली सिधै फाइनलमा पुग्नेछ भने हार्ने टोलीले क्वालिफायर्स–२ का रुपमा दोस्रो मौका पाउने छ ।

प्लेअफमा काठमाडौँ गोर्खाज र लुम्बिनी लायन्स भिड्नेछन् । उक्त खेलको विजेता टोलीले क्वालिफायर्स–२ मा क्वालिफायर्स–१ मा पराजित टोलीसँग खेल्नेछ । विजेता टोली फाइनल पुग्नेछ ।

एनपीएको उपाधिका लागि फाइनल खेल आगामी शनिबार हुनेछ ।