कर्णाली करिडोरको स्थलगत निरीक्षण

हुम्ला – कालीकोटको खुलालुदेखि हिल्सासम्मको २६९ किलोमिटर कर्णाली करिडोर सडकको राष्ट्रिय योजना आयोगका सहसचिव मिमांस अधिकारी नेतृत्वको पाँच सदस्यीय टोलीले स्थलगत निरीक्षण गरेको छ ।

गत माघ २६ देखि यही फागुन १ गतेसम्म सो टोलीले उक्त करिडोर सडकको स्थलगत निरीक्षण गरेको हो । निरीक्षण टोलीमा राष्ट्रिय योजना आयोगका उपसचिव गोकुल खड्का, उत्तर दक्षिण व्यापारिक मार्ग विस्तार आयोजना निर्देशनालयका इन्जिनियर जयराम अधिकारी, कर्णाली करिडोर उत्तर खण्डका योजना प्रमुख बेलबहादुर नेपाली र कर्णाली करिडोर दक्षिण खण्डका योजना प्रमुख विसुन दास लामालगायत रहेका थिए ।

यसै आर्थिक वर्षमा कर्णाली करिडोरको विभिन्न खण्डमा सडक स्तरोन्नतिका लागि रु पाँच अर्ब ४८ करोडको बहुवर्षीय स्रोत सहमतिका लागि माग गरिएको हिल्सा सिमिकोट सडक योजना कार्यालयका योजना प्रमुख बेलबहादुर नेपाली जानकारी दिए ।

स्याउ र ओखरका बिरुवा वितरण

त्यसैगरी हुम्ला जिल्ला कृषि विकास कार्यालयले वागवानी केन्द्रबाट ३३० थान ओखर र ५०० थान स्याउका बिरुवा ५० प्रतिशत अनुदानमा किसानलाई उपलब्ध गराएको छ । एक बोट ओखरका बिरुवालाई रु ५५० र एक बोट स्याउको बिरुवालाई रु ३३० मा बिक्री गरिएको कृषि विकास कार्यालयका प्रमुख चूडामणि पन्तले जानकारी दिए ।

खार्पुनाथ, सर्केगाड र सिमकोट गाउँपालिका किसानहरुलाई स्याउ तथा ओखरका बिरुवा वितरण गरिएकोसमेत कृषि विकास कार्यालय प्रमुख पन्तले बताए । रासस