संवादको प्रतिफलस्वरुप निर्वाचन सम्पन्न भयो : कार्यवाहक प्रमुख आयुक्त भण्डारी

काठमाडौं – निर्वाचन आयोगका कार्यवाहक प्रमुख आयुक्त रामप्रसाद भण्डारीले जेनजी आन्दोलनपछि सबै पक्षसँग छलफल र सकारात्मक संवादका कारण फागुन २१ गतेको प्रतिनिधिसभा सदस्य निर्वाचन सम्पन्न भएको बताए ।

बिहीबार समानुपातिक निर्वाचन प्रणालीतर्फ निर्वाचित १ सय १० जना सांसदहरूलाई प्रमाणपत्र वितरण समारोहलाई सम्बोधन गर्दै कार्यवाहक प्रमुख निर्वाचन आयुक्त भण्डारीले यस्तो बताएका हुन् ।

उनले अन्योलको वातावरणलाई चिर्दै तथा विभिन्न अप्ठ्यारालाई पार लगाउँदै सबैको सहयोगमा निर्धारित समयमा चुनाव सम्पन्न भएको भन्दै सबैको सहयोगका लागि धन्यावाद दिए ।

‘यो आवधिक निर्वाचन नभएर भदौ २३ र २४ को विद्रोहपछि संविधानको संरक्षणका लागि राष्ट्रपतिले घोषणा गरेको निर्वाचन थियो’, भण्डारीले भने, ‘कटुता र निषेधको आशंकाकै बिच आयोगले निर्वाचन कार्यतालिका बनायो र निर्वाचनको विकल्प पनि थिएन ।’

उनले यो निष्ठामा आयोगले सबै पक्षलाई बोलाएर छलफल र संवाद गरेको भन्दै त्यसको परिणाम सांसदहरूले पाएको प्रमाणपत्रलाई लिनुपर्ने बताए ।