काठमाडौं – नेपालको छोचेन खोलास्थित इम्प्याक्ट क्रेटर आसपास हिमनदी वा हिमखण्ड भत्किने जोखिम अझै कायमै रहेको चीनको जलस्रोत मन्त्रालयले जनाएको छ। हिमचट्टान वा हिमनदी भत्किएमा ठूलो सम्भावित खतरा निम्तिन सक्ने भएकाले त्यस क्षेत्रमा निरन्तर निगरानी र पूर्वतयारी आवश्यक रहेको मन्त्रालयले जनाएको हो।
ADVERTISEMENT
चीनको जलस्रोत मन्त्रालयका अनुसार ग्यिरोङ काउन्टीमा लेदोसहितको बाढी आउन सक्ने सम्भावनाबारे नियमित रूपमा अनुगमन तथा परामर्श भइरहेको छ। जोखिमको अवस्था मूल्याङ्कन गर्दै सम्भावित विपद्बाट हुने क्षति न्यूनीकरणका लागि आवश्यक तयारीमा जोड दिइएको छ।
ADVERTISEMENT
यसैबीच, रिमोट-सेन्सिङ विश्लेषणबाट ग्यिरोङ साङ्पो नदी बेसिनमा रहेका १४ वटा हिमतालको जलसतहमा उल्लेखनीय परिवर्तन नदेखिएको बताइएको छ। मन्त्रालयका अनुसार ती हिमतालहरू हाल स्थिर अवस्थामा रहेका छन्।
यद्यपि, इम्प्याक्ट क्रेटर आसपास हिमनदी तथा हिमखण्ड भत्किने सम्भावना पूर्ण रूपमा टरिनसकेको भन्दै चिनियाँ पक्षले अवस्थाको निरन्तर अनुगमन गरिरहेको छ। सम्भावित जोखिमबारे समयमै जानकारी प्राप्त गरी आवश्यक कदम चाल्न निगरानीलाई प्राथमिकता दिइएको मन्त्रालयले जनाएको छ।
