काठमाडौं- राष्ट्रपति रामचन्द्र पौडेलले सोमबार राष्ट्रका नाममा सम्बोधन गरेका छन्। रसुवा र नुवाकोटका बाढी प्रभावित क्षेत्रको स्थलगत अवलोकन गरेर काठमाडौं फर्किएपछि राष्ट्रपति पौडेलले नेपाल टेलिभिजनमार्फत राष्ट्रका नाममा सम्बोधन गरेका हुन्।
ADVERTISEMENT
सम्बोधनका क्रममा राष्ट्रपति पौडेलले पछिल्लो समय आएको प्राकृतिक विपत्तिबाट ठूलो जनधनको क्षति भएकोप्रति दुःख व्यक्त गर्दै प्रभावित परिवारप्रति समवेदना प्रकट गरेका छन्। उनले बाढी, पहिरो तथा अन्य विपत्तिबाट प्रभावित नागरिकको उद्धार, राहत र पुनःस्थापनालाई राज्यको पहिलो प्राथमिकतामा राख्नुपर्ने बताएका छन्।
ADVERTISEMENT
राष्ट्रपति पौडेलले विपत्तिको समयमा प्रभावित नागरिकलाई तत्काल आवश्यक राहत सामग्री, सुरक्षित आवास तथा आधारभूत सेवाको सुनिश्चितता गर्न सरकारका सम्बन्धित निकायलाई प्रभावकारी रूपमा परिचालन गर्नुपर्नेमा जोड दिएका छन्। विपत्तिपछि क्षतिग्रस्त सडक, पुल, विद्युत्, सञ्चार तथा अन्य पूर्वाधारको पुनर्निर्माणलाई पनि तीव्रता दिनुपर्ने उनको भनाइ छ।
उनले विपत्तिको सामना कुनै एक निकाय वा सरकारको प्रयासबाट मात्रै सम्भव नहुने भन्दै संघ, प्रदेश र स्थानीय तहका साथै सुरक्षा निकाय, नागरिक समाज, निजी क्षेत्र तथा आम नागरिकबीच प्रभावकारी समन्वय र सहकार्य आवश्यक रहेको बताएका छन्।
राष्ट्रपति पौडेलले कठिन परिस्थितिमा एकअर्काको दुःखमा साथ दिँदै मानवीय सहयोग र एकताको भावना अझ बलियो बनाउन समेत सबैमा आह्वान गरेका छन्। विपत्तिबाट प्रभावित नागरिकलाई राज्यले आवश्यक सहयोग र संरक्षण प्रदान गर्ने विश्वास व्यक्त गर्दै उनले पुनःस्थापना तथा पुनर्निर्माणको कामलाई प्रभावकारी ढंगले अघि बढाउनुपर्ने बताएका छन्।
