इन्टरनेटमा १३ प्रतिशत कर लगाउने निर्णयविरुद्ध नेविसंघले प्राधिकरणको कार्यालय घेराउ गर्ने

काठमाडौँ– नेपाली कांग्रेसको भातृ संगठन नेपाल विद्यार्थी संघले इन्टरनेटमा १३ प्रतिशत कर वृद्धि गर्ने सरकारको निर्णय विरुद्ध प्रदर्शन गर्ने भएको छ । सरकारले साउन १ गते अर्थात हिजोदेखि मोबाइल र इन्टरनेटमा थप १३ प्रतिशत कर बढाएको विरोधमा नेविसंघले नेपाल दुरसञ्चार प्राधिकरणको कार्यालय अगाडि आन्दोलन गर्ने भएको हो ।

संगठनले आज दिउँसो ३ बजे कमलादीस्थित नेपाल दुरसञ्चार प्राधिकरणको केन्द्रीय कार्यालय अगाडि धर्ना र घेराउ गर्ने नेविसंघ अध्यक्ष नैनसिंह महरले जानकारी दिए । चुनाव अघि फ्रि वाइफाइको नारा दिएको ओली सरकारले चुनावपछि इन्टरनेटमा थप १३ प्रतिशत कर लगाएर निमुखा जनताको ढाड सेक्ने काम गरेको उनले बताए ।

यसअघि ११ प्रतिशत कर तिरिरहे पनि त्यसमा थप १३ प्रतिशत जोडिएपछि आमनागरिकको दैनिकीको पर्याय बनिसकेको इन्टरनेट महंगिएपछि सवत्र यसको विरोध भइरहेको छ ।