काठमाडौं–सागर पुनको उत्कृष्ट ब्याटिङमा नेपालले एसिया कप छनोटमा ओमानविरूद्ध २२१ रनको लक्ष्य दिएको छ । मलेसियाको वायुमास ओभल मैदानमा टस हारेर पहिले ब्याटिङ गरेको नेपालका लागि सागर पुनले उत्कृष्ट ब्याटिङ गर्दै ८३ रन बनाए ।
ADVERTISEMENT
संकटमा परेको नेपाली टिमलाई सम्हालेका पुनले ८५ बल खेल्दै २ छक्का र ६ चौकासहित ८३ रन बनाएर रन आउट भए । सागर पुनसँग ९२ रनको साझेदारी गरेका आरिफ शेख ३५ रनमा आउट भएका थिए ।
ADVERTISEMENT
टिमको स्कोर ८० रन हुँदा ४ विकेट गुमाइसकेको अवस्थामा नेपालका लागि पुन र शेखले ९२ रनको साझेदारी गर्दै टिममलाई सम्मानजनक स्कोर बनाए । अन्तिममा आएका करण केसीले बिस्फोटक ब्याटिङ गर्दै ८ बलमा २३ रन बनाएर नटआउट रहे ।
नेपालका लागि उपकप्तान ज्ञानेन्द्र मल्लले ४५ रन बनाएर आउट भएका थिए । उनले ६० बल खेल्दै ६ चौका र एक छक्का प्रहार गरे । यस्तै दिपेन्द्र सिंह ऐरीले ९ रन बनाउँदा कप्तान पारस खड्का ८ रनमै आउट भए ।
यसअघि ओपनर सुवास खकुरेल ४ रन बनाएर आउट भएका थिए । सोमपाल कामी ५ रनमा आउट हुँदा रोहितकुमार पौडेल शून्य रनमा आउट भए। बसन्त रेग्मीले कुनै पनि बल खेल्नै नपाइ शुन्यमा रन आउट भए ।
ओमानका लागि मोहम्मद नादिम बिलाल खान र लालचेताले समान २–२ विकेट लिएका थिए ।
नेपाल र ओमान डिभिजनस्तरका चिरप्रतिद्धन्द्धी हुन् । सात महिना अगाडि नेपाल डिभिजन टु मा रेलिगेसनमा पर्दा ओमानले पनि त्यो प्रतियोगिता खेलेको थियो ।
पहिलो खेलमा ओमानविरुद्ध मैदान उत्रदा नेपाल शानदार सुरुवातको खोजीमा रहनेछ । तर, नेपाललाई सोचे जस्तो सहज छैन । किनकी ओमान पनि जितबाट प्रतियोगिताको सुरुवात गर्न चाहन्छ ।
पछिल्लो नतिजा हेर्दा ओमानविरुद्ध नेपालको प्रदर्शन उच्च छैन । एकदिवसीय क्रिकेटमा ६ पटक भिडे पनि नेपालले पछिल्लो पाँच वर्षयता ओमानलाई हराउन सकेको छैन । तर, ६ भेटमा नेपाल र ओमानले समान ३–३ पटक जित निकालेका छन् ।
पछिल्लो ५ वर्षयता ओमानविरुद्ध जित निकाल्न नसकेको नेपालले सन् २००२ को एसीसी ट्रफीमा ओमानलाई १०५ रनले हराएको थियो । त्यसको आठ वर्षपछि भिड्दा नेपाल ६ विकेटले विजयी भएको थियो ।
अन्तिम पटक नेपालले ओमानविरुद्ध २०१३ को डिभिजन थ्रीमा जित निकालेको थियो । त्यसपछिका दुई भिडन्तमा नेपाल पराजित भएको छ ।
जसमा २०१४ को एसीसी प्रिमियर लिगमा २ विकेटको जित निकाल्दा २०१८ को डिभिजन टू मा ओमानले ६ विकेटको जित हासिल गरेको थियो ।
प्रतियोगितामा नेपालले दोस्रो खेलमा युएईसँग खेल्नेछ । जुन खेललार्इ आइसीसीले अन्तर्राष्ट्रिय एकदिवशीय मान्यता दिएको छ।
एसिया कपमा नेपालसहित आयोजक मलेसिया, युएई, हङकङ,सिंगापुर र ओमानले खेल्ने छन् । राउण्ड रोबिनको आधारमा हुने छनोटको शीर्ष दुई टोलीले फाइनलमा खेल्ने छन्।
छनोटको बिजेताले युएईमा हुने एसिया कपमा सहभागिता जनाउने छन् । एकदिवसीय फर्म्याटको एसिया कपमा भारत, पाकिस्तान, श्रीलंका, बंगलादेश र अफगानिस्तान जस्ता टेष्ट राष्ट्रको सहभागिता रहने छ । छनोटको बिजेता सेम्टेम्बर १३ देखि २८ तारिखसम्म हुने एसिया कपको समूह ए मा पर्नेछ । उक्त समूहमा भारत र पाकिस्तान रहेको छ ।
