“नेपालीको इच्छा नै फाइनलमा भारतलाई हराउदैँ विजेता बनेको हेर्नु हो”– बिमल घर्ती मगर

ढाका– ढाकाको बंगबन्धु राष्ट्रिय रंगशालामा शनिबार भएको साफ च्याम्पियनसिप खेलमा नेपालले बंगलादेशलार्इ दुर्इ गोलले हराएर समूह विजेता बन्दै सेमिफाइन पुगेको छ ।

पहिलो हाफको ३३ औँ मिनेटमा नेपालले पाएको फ्री किकको अवसरलार्इ फरवार्ड विमल घर्ती मगरले सदुपयोग गर्दै गोलमा परिणत गरेका थिए । दोस्रो हाफको ९० औँ मिनेटमा नवयुग श्रेष्ठले गोल गर्दै नेपालको जित सुनिश्चित बनाएका थिए ।

बंगलादेशलार्इ २–० गोल अन्तरले हराउँदै सेमिफाइनलमा पुगेपछि फाइनलमा भारतलाई हराएर साफ सुजुकी कपको उपाधि भित्र्याउन आतुर रहेको नेपालका स्ट्राइकर विमल घर्ती मगरले बताएका छन् । ब‍ंगबन्धु रंगशलामा भएको खेलपछि उनले प्रतिक्रिया दिने क्रममा फाइनलमा भारतलाई हराएर साफ सुजुकी कपको उपाधि भित्र्याउन आतुर रहेको बताएका हुन् ।

पत्रकारहरूले सेमिफाइलनमा मालदिभ्स कि भारत आओस् भन्ने चाहना राख्नुभएको छ ? भन्ने प्रश्नको जवाफ दिँदै उनले भने, ‘सेमिफाइनलमा मालदिभ्सै आओस् भन्ने चाहन्छु । किन की भारतसँग चाहिँ फाइनलै लडेर विजेता बन्ने इच्छा छ’ उनले थपे ‘मेरो मात्रै हो इच्छा होइन सबै नेपालीहरूको नै भारतलाई जितेर विजेता बन्ने इच्छा छ ।’

विमलले नेपाल च्याम्पियन बन्न तयार भएको पनि बताएका छन् उनले भने, ‘हामी ट्रफीको नजिक पुगिसकेका छौँ । त्यसैले हामी भारतलाई फाइनलमै हराउन चाहन्छौँ ।’

प्रत्येक खेलमा एकपछि अर्को सुधार भइरहेकाले आफूहरू सफल हुने उनले बताए । ‘प्रशिक्षकले पनि टिमवर्कमा जोड दिएकाले हामीले आज पनि टिम गेम खेल्यौ’, उनले भने, ‘हामीले यही गतिलाई कायम गर्दै फाइनलमा पुगेर उपाधि उचाल्न चाहन्छौँ ।’