बागलुङ– बागलुङमा आयोजित जिल्ला लिग फुटबल प्रतियोगिताको उपाधि फ्युचर स्पोर्टस् क्लबले जितेको छ । स्थानीय बाङ्गेचौर खेल मैदानमा मङ्गलबार भएको फाइनल खेलमा चिल्ड्रेन लाइफलाई दुई गोलका विरुद्ध तीन गोल गर्दै फ्युचरले उपाधि हात पारेको हो ।
लिग विजेता फ्युचरले नगद रु ५० हजार र ट्रफी प्राप्त गरेको छ भने उपविजेता चिल्ड्रेन लाइफले नगद रु २५ हजारसहित ट्रफी हात पारेको छ । जिल्ला फुटबल सङ्घको आयोजनामा भएको प्रतियोगितामा चिल्ड्रेन लाइफका दिलीप जिसीले उत्कृष्ट खेलाडी घोषित हुँदै नगद रु दुई हजार पुरस्कार प्राप्त गरेका छन्।
यस्तै, उत्कृष्ट गोलकिपरमा पनि सोही टोलीकै सुनिल थापा, उत्कृष्ट डिफेन्डरमा पावर फिटनेस क्लबका क्षितिज आचार्य, उत्कृष्ट मिड फिल्डरमा रुद्रेपिपल युवा क्लबका युकेश थापा र उत्कृष्ट स्ट्राइकरमा चिल्ड्रेन लाइफमा दिलीप जिसी र उच्च गोलकर्तामा चिल्ड्रेन लाइफका दिवस बुढाथोकी घोषित हुँदै सबैले नगद रु एक÷एक हजार पुरस्कार पाएका छन् ।
अखिल नेपाल फुटबल सङ्घ (एन्फा)को वार्षिक कार्यक्रमअनुसार भएको प्रतियोगितामा आठ टोली सहभागी भएको सङ्घका अध्यक्ष रामराज गुरुङले जानकारी दिए ।