निर्मला प्रकरणमा गम्भीर लापरबाही गर्ने दुई प्रहरी कर्मचारी निलम्बित

काठमाडौँ– कञ्चनपुरकी १३ वर्षीय बालिका निर्मला पन्तको बलात्कारपछि भएको हत्या प्रकरणमा घटना स्थलमा अनुसन्धानका क्रममा गम्भीर लापरबाही गरेको भन्दै प्रहरी नायव निरीक्षक हरसिंह धामी र जवान चाँदनी साउँदलाई निलम्बन गरिएको छ ।

हत्यापछि अनुसन्धानमा संलग्न प्रहरी अधिकारीको भूमिकामाथि छानविन गर्न प्रहरी प्रधान कार्यालयबाट गठित समितिको सिफारिसमा जिल्ला प्रहरी कार्यालय कञ्चनपुरमा कार्यरत दुई प्रहरी अधिकारीलाई निलम्बन गरिएको हो ।

उनीहरुलाई प्रहरी नियमावली, २०७१ को नियम ११५ को उपनियम ५ (क) र (ग) अनुसार सई धामी र जवान साउँद निलम्बन गरिएको प्रहरी प्रधान कार्यालयनले जनाएको छ । निर्मलाको घटना स्थलमा अनुसन्धान गर्दा प्रमाण नष्ट हुने गरी काम गरेको उनीहरुलाई आरोप लागेको छ ।

घटनाको छानविनका लागि गत भाद्र ३१ गते प्रहरी प्रधान कार्यालयले एआइजी धिरु बस्नेतको नेतृत्वमा ‘शक्तिशाली’ छानबिन समिति गठन गरेको थियो ।