काठमाडौंका सबै स्कुलमा अब एउटै पोसाक

काठमाडौं । काठमाडौं महानगरपालिकाले महानगरभित्रका सबै सामुदायिक र संस्थागत विद्यालयमा एउटै पोसाक लागू गर्ने भएको छ।

‘महानगरीय शिक्षा रूपन्तारण अभियान सुधार सोच’ कार्यक्रमअन्तर्गत सामुदायिक र संस्थागत विद्यार्थीको पोसाकमा एकरूपता ल्याउन लागिएको महानगर शिक्षा विभागका अधिकारी सीताराम कोइरालाले जनाए।

‘विदेशका महानगरमा रहेका विद्यालयका पोसाक एउटै हुन्छ,’ उनले भने, ‘हामीले पनि एउटै प्रकारको पोसाक लगाएर महानगरका विद्यालयमा एकरूपता ल्याउन थालेका हौं।’

यसैगरी महानगरले विद्यालयको बिदामा समेत एकरूपता ल्याउन शैक्षिक क्यालेन्डर लागू गर्ने भएको छ।