दीपेन्द्र सिंह ऐरीको कप्तानी इनिङसंगै अत्तरियाको दोस्रो जित, रुपन्देही ३९ रनले पराजित

काठमाडौँ– धनगढीमा जाररी तेस्रो संस्करणको ध्नगढी प्रिमियर लिग (डीपीएल) क्रिकेट प्रतियोगितामा कप्तान दीपेन्द्र सिंह ऐरीले कप्तानी इनिङ खेलेपछि सीवाइसी अत्तरियाले लगातार दोस्रो जित हात पारेको छ । अत्तरियाले यसअघिको दुई खेल जितेर समूहको अग्रस्थानमा रहेको रुपन्देही च्यालेन्जर्सलाई ३९ रनले पराजित गरेको हो ।

धनगढीस्थित फाप्ला अन्तर्राष्ट्रिय क्रिकेट मैदानमा टस जितेर फिल्डिङ रोजेको अत्तरियाले निर्धारित २० ओभरमा ९ विकेट गुमाउँदै १२१ रन बनायो । १२२ रनको लक्ष्यपच्छ्याउँदै जवाफी ब्याटिङमा उत्रिएको रुपन्देहीले निर्धारित २० ओभरमा  सबै विकेट गुमाउँदै ८२ रनमै समेटियो ।

उसका लागि आठौँ नम्बरमा आएका सुमित महर्जनले सर्वाधिक अविजित २१ रन बनाए । उनले २१ बलमा १ छक्का र १ चौका हाने । यस्तै सन्दीप सुनारले १५ रन बनाउँदा विक्रम सोब र प्रदीप ऐरीले समान १४ रन जोडे । विनोद भण्डारीले १७ बलमा १० रन बनाए । अन्यले दोहोरो अंक छुन सकेनन् ।

यता अत्तरियाका लागि दीपेन्द्र सिंह ऐरी, सन्नी पटेल, भुवन कार्की र दीपेन्द्र रावतले समान २/२ विकेट लिए । कमल सिंह ऐरीका नाममा १ विकेट रह्यो ।

यसअघि दीपेन्द्र सिंह ऐरीले कप्तानी इनिङ खेलेपछि अत्तरियाले १२१ रनको सम्मानजनक स्कोर बनायो । दीपेन्द्रले रित गौतमसंग मिलेर गरेको ५७ रनको महत्वपूर्ण साझेदारी नै जितको प्रमुख कारण बन्यो ।

दीपेन्द्रले प्रतियोगिताकै तेस्रो अर्धशतक प्रहार गर्ने क्रममा ५० बलमा ६७ रन बनाए । बाबर हायातबाट रन आउट हुनु अघि उनले १० वटा चौका र एक छक्का प्रहार गरे । यस्तै रित गौतमले २० बलमा १२ रन बनाउँदा सुभेन्दु पाण्डे र सन्नी पटेलले पनि समान १२/१२ रन नै जोडे ।

यता रुपन्देहीका लागि ललितसिंह भण्डारीले ३ विकेट लिए । उनले चार ओभरमा २३ रन खर्चिए । यस्तै विक्रम सोबले दुई विकेट लिँदा वसन्त रेग्मी र पुनित मेहराले समान १/१ विकेट लिए ।