सामाजिक सञ्जाल नेपालमा दर्ता हुनैपर्छ : मन्त्री बास्कोटा

काठमाडौं – सञ्चार तथा सूचना प्रविधिमन्त्री गोकुल बास्कोटाले फेसबुक, ट्वीटरजस्ता सामाजिक सञ्जाल नेपालमा दर्ता हुनैपर्ने बताएका छन् ।

संसदमा दर्ता भएको सूचना प्रविधिसम्बन्धी विधेयकमाथि छलफलमा उठेका प्रश्नको जवाफ दिँदै मन्त्री बास्कोटाले सामाजिक सञ्जाल प्रयोगकर्ताले व्यक्तिगत रुपमा दर्ता गर्ने नभई सामाजिक सञ्जाल सञ्चालक दर्ता हुने व्यवस्था गरिएको पनि बताए । उनले कहिँ नभएको कुरा नेपालमा मात्र ब्यवस्था गर्न लागेको नभई अन्य देशले गरेको व्यवस्था नेपालमा पनि अनुकरण गरिएको बताए ।

‘कहिँ नभएको कुरा यहाँ गर्न खोजिएको भन्ने होइन, यसले आलोचकलाई दण्डित गर्दैन । तर पशुको ज्यानमा चिनिएको मान्छेको टाउको राखेर पनि अपमानित गर्ने कुरा संस्कार र संस्कृतिलाई छुट नदिने नै हो ।’ मन्त्री बास्कोटाले भने ।

आजको युगमा साइबर सुरक्षाको विषय राष्ट्रको सुरक्षाको विषय पनि बनेको भन्दै मन्त्री बास्कोटाले त्यसै अनुसार यो विधेयक ल्याइएको बताए । सामाजिक सञ्जाल प्रयोगकर्ता नभई कम्पनी दर्ता हुनुपर्नेगरी विधेयक ल्याउन लागेको उनले बताए ।

‘सामाजिक सञ्जाल प्रयोगकर्ता व्यक्तिगतरुपमा हामीले भनेको होइन । जसले नेटवर्किङ गरेर कम्पनी चतलाउँछन्, उनीहरु अवश्य नै दर्ता हुनुपर्दछ ।’ मन्त्री बाँस्कोटाले भने, ‘चाहे फेसबुक होस्, चाहे ट्वीटर होस्, चाहे वीच्याट, इमोको होस्, चाहे गुगलको होस् । अन्त खोल्न हुन्छ, हामीकहाँ खोल्न हुँदैन ?’

उनले कसैप्रति पूर्वाग्रह साँध्नका लागि विधेयक नल्याइएको प्रष्टीकरण दिए । ‘हाम्रो सामाजिक हिसाबले हो, छिमेकी देशले पनि यस्ता ऐन कानून लेराएकै छन्’ उनले भने ।