‘सिके राउतसँग गरिएको सहमतिको अपव्याख्या गरियो’

काठमाडौँ – तत्कालीन राजनीतिक वार्ता टोली संयोजक सोमप्रसाद पाण्डेले सरकार र चन्द्रकान्त (सिके) राउतसँग गरिएको ११ बुँदे सहमतिलाई अपव्याख्या गरिएको बताएका छन् । सम्वाद चौतारीले आज यहाँ आयोजना गरेको अन्तरक्रियामा उनले सहमतिको बुँदा नं २ मा उल्लेख गरिएको जनअभिमत शब्दलाई अपव्याख्या गरेर जनमत सङ्ग्रह बनाइएको बताए।

गत शुक्रबार भएको ११ बुँदे सहमतिको बुँदा नं २ मा तराई–मधेशलगायत देशका कतिपय स्थानमा रहेका असन्तुष्टीलाई जनअभिमतमा आधारित लोकतान्त्रिक विधिबाट समाधान गर्ने उल्लेख गरिएको छ । ‘‘सरकारले राउतसँग कुनै पनि विषयमा जनमत सङ्ग्रह गर्ने कुरामा सहमति गरेको छैन’’, उनले भने, ‘‘जनअभिमतलाई वास्तविक अर्थ लगाउनेभन्दा पनि जनमत सङ्ग्रहको अर्थ लगाउने गरिएको छ । सहमतिमा जनअभिमत शब्दको अर्थ जनमत सङ्ग्रह होइन ।’’

संयोजक पाण्डेले राउतसँगको सहमति प्रधानमन्त्री केपी शर्मा ओली, गृहमन्त्री रामबहादुर थापा र नेपाल कम्युनिष्ट पार्टी(नेकपा)का शीर्ष नेताहरुको सहमतिअनुसार नै गरिएको जानकारी गराए। ‘‘दुई(चार दिनको छलफलले राउतसँग सहमति गरिएको होइन’’ उनले भने, ‘‘लामो छलफलपश्चात राउतले देश विखण्डन गर्ने कुरा त्याग्ने भएपछि मात्र सहमति गरिएको हो ।’’

सांसद पाण्डेले सहमतिपश्चात राउतका कार्यकर्ताले मधेशमा गरिरहेका गतिविधि तुरन्तै रोक्नुपर्ने बताए। उनले तत्कालीन वार्ता टोलीले ४४ वटा राजनीतिक समूहमध्ये २९ वटासँग वार्ता गरेको जानकारी गराए ।

राजनीतिक विश्लेषक डा सुरेन्द्र केसीले जनअभिमत शब्दले जनमत सङ्ग्रहलाई नै जनाउने भन्दै जनअभिमत शब्दबारे सरकारले जनतालाई स्पष्ट गराउनुपर्ने बताए। उनले सरकारले राउतसँग गरिएको सहमतिबारे नेकपाभित्र छलफल गरेर गरेको भए राम्रो हुने धारणा राखे। ‘‘सरकार र राउतबीच भएको सहमति सत्तारुढ नेकपाभित्र नै विवाद देखिएको छ’’ उनले भने, ‘‘यसले गर्दा सरकारले आफ्नै दलभित्र पर्याप्त छलफल भएको देखिएन । सरकारले आफ्नै दललाई समेत विश्वास दिलाउन सकेको देखिँदैैन ।’’