नेपाल-बंगलादेश यू-२३ मैत्रिपूर्ण फुटबल : पहिलो हाफ सकिँदा नेपाल १-० ले अगाडी

काठमाडौँ– संयुक्त अरब इमिरेट्स (युएई) मा हुने एएफसी २३ वर्षमुनि (यु–२३) च्याम्पियनसिप छनोटको तयारीमा रहेको नेपाली टोलीले आज बङ्गलादेशको २३ वर्षमुनिको राष्ट्रिय टोलीसँग मैत्रीपूर्ण फुटबल खेल खेलिरहेको छ ।

खेलको  पहिलो हाफ सकिँदा नेपालले १–० गोलको अग्रता लिएको छ । सातदोबाटोस्थित अखिल नेपाल फुटबल सङ्घ (एन्फा) को खेल मैदानमा अपरान्ह तीन बजेदेखि सुरु भएको खेलको १९ औँ मिनेटमा कप्तान विमल घर्तिमगरले गोल गरेपछि नेपालले अग्रता लिएको हो
हो । उनले अन्जन बिष्टको पासमा गोल गरेका थिए । दुई पटक गोल गर्ने मौका पाएपनि बंगलादेशले सदुपयोग गर्न सकेन ।

नेपालको तर्फबाट विमल घर्तीमगर, अनन्त तामाङ, हेमन्त थापामगर, एलन नेउपाने, कमल श्रेष्ठ, दिनेश राजबंशी, अञ्जन बिष्ट र सुनिल बललगायतका खेलाडी मैदानमा उत्रिएका छन् ।

बङ्गलादेशविरुद्धको खेल र युएइमा हुने छनोट प्रतियोगिताका लागि मुख्य प्रशिक्षक राजुकाजी शाक्यले आइतबार घर्ती मगरको कप्तानीमा २३ सदस्यीय अन्तिम टोली घोषणा गरेका थिए ।