परराष्ट्र मन्त्रीद्वारा अंगदानको घोषणा

काठमाडौँ – परराष्ट्र मन्त्री प्रदीप ज्ञवालीले अङ्गदान गरेका छन् । मन्त्री ज्ञवालीले शुक्रवार शहीद धर्मभक्त राष्ट्रिय प्रत्यारोपण केन्द्रमा आयोजित कार्यक्रममा अंगदानको घोषणा गरेका हुन् ।

मन्त्री ज्ञवालीले आज मृत्यु पश्चात मृगौला, मुटु, फोक्सो, कलोजो, प्याङक्रियाज, सानो आन्द्रा अङ्ग दान गरेका हुन् ।

उमेरले ५८ वर्ष पुगेका ज्ञवालीको यी ६ अङ्ग मृत्यु पश्चात आवश्यक भएको जुनसुकै बिरामी व्यक्तिको शरीरमा प्रत्यारोपण गर्न सकिने छ ।

यस्तै परराष्ट्रमन्त्री ज्ञवालीका पत्नी सरस्वती ज्ञवाली अर्यालले पनि अंगदानको घोषणा गरेकी छन् ।

पछिल्लो समय नेपालमा पनि अङ्गदान गर्ने व्यक्तिहरुको संख्या बढ्दै गईरहेको छ ।

मृत्यु पश्चात अङ्ग दान गर्ने हो भने एक व्यक्तिको अङ्गबाट धेरै नागरिकले नयाँ जीवन पाउन सक्छन् ।