काठमाडौँ – सिंहदरबारस्थित पुतली बगैँचामा नयाँ संसद भवन बन्ने भएको छ । प्रधानमन्त्री केपी शर्मा ओलीले बुधबार संघीय संसद भवनको शिलान्यास गरेका हुन् ।
पुतली बगैँचा रहेको स्थानमा पाँच अर्ब ३० करोड खर्चिएर भवन निर्माण गर्न लागिएको हो। १ सय ७३ रोपनी क्षेत्रमा फैलने भवनमा प्रतिनिधिसभा र राष्ट्रियसभा रहनेछ। संघीय संसद लामो समयदेखि भवनविहीन रहँदै आएको छ । हाल नयाँ बानेश्वरस्थित अन्तर्राष्ट्रिय सम्मेलन केन्द्रमा संसद सञ्चालन हुँदै आएको छ। अन्तर्राष्ट्रिय सम्मेलन केन्द्रलाई सरकारले वार्षिक १५ करोड भाडा तिर्ने गरेको छ।
संघीय संसद् भवन निर्माण सहरी विकास मन्त्रालय अन्तर्गतको सहरी विकास तथा भवन निर्माण विभागले अगाडि बढाएको हो । भवन निर्माणको काम तीन वर्षभित्र सम्पन्न गरिसक्ने लक्ष्य छ ।
भवनको निर्माण समय र गुणस्तरीयतामा कुनै सम्झौता नहुने प्रधानमन्त्री ओलीको भनाइ छ । “निर्माणमा कुनै प्रकारको विलम्ब मान्य हुँदैन । समयभित्र काम सक्नुहोस । गुणस्तरमा सम्झौता हुँदैन ।” प्रधानमन्त्री ओलीले भने, “यस भवनमा नेपाललाई अग्रगतिमा लैजाने ठुला ठुला निर्णयहरु हुनेछन् । यही भवनबाट धेरैवटा सक्षम सरकारहरु बन्नेछन् भन्ने मेरो अपेक्षा छ ।”
प्रधानमन्त्री ओलीले देश विकासको गतिमा अघि बढीसकेको उल्लेख गरे । “हामीले डेढ बर्षमा गरेका कामको परिणाम देखिन थालेको छ । अमलेखगञ्ज मोतीहारी पाइपलाइनबाट इन्धन ल्याउने कुरा त्यसको एउटा उदाहरण हो” उनले भने, “आगामी चैतभित्र रानी पोखरी निर्माण भइसक्छ । अरु यस्ता थुप्रै ठुला आयोजनाहरु अब निर्माण सम्पन्न भइसक्नेछन् ।”
सरकार सुशासन र भ्रष्टचार विरोधी अभियानमा सक्रियतापूर्वक लागेको उनको भनाई छ । “हामी भ्रष्टाचार विरोधी अभियान यसरी चलाउँछौं कि यो संसदमा त्यस बिषयमा बहस नै गर्नु नपरोस ” प्रधानमन्त्री ओलीले भने ।
उनले लोकतन्त्र माथी कतैबट खतरा आए सरकार सहेर नबस्ने बताएका छन् । “लोकतन्त्र माथी खतरा आए सरकार सहेर बस्दैन । संविधान अनुसार जनताको बलिानी खेर जान नदिन हामी सजग छौं” प्रधानमन्त्री ओलीले भने “हामी लोकतान्त्रिक प्रणालीमा मात्र होइन,लोकतान्त्रिक प्रक्रियामा पनि विश्वास गर्छौं ।”