प्रतिपक्षीमा बसेर आत्मसमीक्षा गर्ने मौका माओवादी प्राप्त हुँदैछ : योगेश भट्टराई

काठमाडौँ – नेकपा एमालेका नेता योगेश भट्टराईले लामो समयपछि प्रतिपक्षीमा बसेर आत्मसमीक्षा गर्ने मौका माओवादीलाई प्राप्त हुन लागेको बताएका छन् ।

शुक्रबार प्रतिनिधिसभा बैठकमा भट्टराईले लामो समय सत्तामा बसेका कारण माओवादीले आफ्नो मूल उद्देश्य बिर्सिएको हुन सक्ने कटाक्ष गर्दै अब प्रतिपक्षीमा बसेर आत्मसमीक्षा गर्ने मौका प्राप्त हुने बताए ।

उनले सरकारबाट हट्नुको पीडा प्रचण्डले सदनमा देखाएको आरोप लगाए । सदनमा प्रधानमन्त्रीले गलत तथ्याङ्क प्रस्तुत गरेको भन्दै उनले सदनले पछिसम्म पनि यसको जवाफ खोजी रहने तर्क गरे । उनले देशले निकास र अग्रगमन खोजेकाले कांग्रेस र एमाले एक ठाउँमा आइपुगेको दाबी गरे ।

आफूलाई अनुकुल हुँदा एउटा र प्रतिकूल हुँदा अर्को व्याख्या नगर्न सुझाव दिदै उनले देशको हितका लागि सवै एकैठाँउ आउनुपर्ने जिकिर गरे ।

उनले मुलुकको आवश्यकता अनुसार संविधान संशोधन हुने भन्दै अनावश्यक आशंका नगर्न पनि आग्रह गरे । उनले माओवादीले लगानी भन्दा बढी नाफा खाजेको उल्लेख गर्दै माओवादीको धितो जमानत नपुग्दा पनि व्यक्तित्वका आधारमा प्रचण्डलाई साथ दिएको बताए ।