बलिया पार्टीले काँध थाप्दा पनि प्रचण्ड सरकारले लय समात्न सकेन : प्रधानमन्त्री ओली

काठमाडौँ – प्रधानमन्त्री केपी शर्मा ओलीले बलिया पार्टीले काँध थाप्दा पनि अघिल्लो सरकारले लय नसमातेका कारण नयाँ सरकार गठन गर्नुपरेको बताएका छन् ।

आइतबार प्रतिनिधिसभा बैठकमा विश्वासको मतको प्रस्ताव प्रस्तुत गर्दै प्रधानमन्त्री ओलीले यसअघि कहिले कांग्रेस र कहिले एमालेले काँध थाप्दा पनि माओवादी नेतृत्वको सरकारले लय समात्न नसकेको र त्यसको प्रयास पनि नगरेका कारण नयाँ सरकार गठन गर्नुपरेको बताएका हुन् ।

सरकारकै कारण समाजमा दूषित परिणाम देखिने संकेत आएकाले देशलाई त्यसबाट जोगाउनका लागि कांग्रेस–एमालेबीच समिकरण बनेको उनले बताए । सम्बोधनका क्रममा प्रधानमन्त्री ओलीले सरकार गठनका लागि दुईदलबीच भएको साँत बँुदे सहमति पनि सार्वजनिक गरे ।

सरकारको नेतृत्व आलोपालो गर्ने, भ्रष्टाचारको अन्त्य गरी सुशासन कायम गर्न साझा कार्यक्रम तय गर्ने लगाएतका सहमति दुईदलबीच भएको भन्दै उनले यसमा लुकाउनुपर्ने केही नभएको जिकिर गरे । प्रधानमन्त्री ओलीले भ्रष्टाचार पूर्णरुपमा अन्त्य गर्नेगरि सरकारले काम गर्ने, सहकारी ठगि गर्ने जोसुकैलाई कारवाही गर्ने समेत बताए । उनले दुई तिहाईको बलमा नभइ देशको आवश्यकताका आधारमा सर्वसम्मत ढंगले संविधान संशोधन गर्ने उल्लेख गर्दै संविधान संशोधनबाट तर्सिनुपर्ने अवस्था नरहेको स्पष्ट पारे ।

उनले जनतामा उत्साहको सञ्चार गर्न र देशलाई तीव्र आर्थिक वृद्धिको दिशामा लैजान अहिलेको सरकार बनेको पनि बताए । विकास निर्माणको काममा रहेको बेथिति अन्त्य, आर्थिक रुपमा मितव्ययी बन्दै राज्यको तर्फबाट खर्च गर्ने क्षमता वृद्धि तथा जनअपेक्षा अनुसार कानुनमा सुधार गर्ने उनले बताए ।