नेपाल साफ यू-२० च्याम्पियनसिपको फाइनलमा, भुटान पेनाल्टी सुटआउटमा स्तब्ध

काठमाडौँ – नेपाल काठमाडौँमा जारी साफ यू–२० च्याम्पियनसिप फुटबल प्रतियोगिताको फाइनलमा प्रवेश गरेको छ । आइतबार भएको सेमिफाइनलमा भुटानलाई पेनाल्टी सुटआउटमा ४–१ ले हराउँदै नेपालले फाइनलको यात्रा तय गरेको हो ।

खेल निर्धारित ९० मिजेटको समयमा १–१ को बराबरीमा रोकिएपछि पेनाल्टी सुटआउटा पुगेको थियो । पेनाल्टी सुटआउमा नेपालका गोलकिपर जियारथ शेख नायक बने । उनले भुटानका २ प्रहार रोकेपछि नेपालले खेल ४–१ ले जितेको हो ।

त्यसअघि खेल पहिलो हाफ गोररहित बराबरीमा टुंगियो । दोस्रो हाफ सुरु भएपछि खेलको ५६औँ मिनेटमा जेत्सन दोर्जेले डी बक्स बाहिरबाटै शानदार गोल गर्दै भुटानलाई सुरुवाती अग्रता दिलाएका थिए ।

तर, भुटान खेलको ७७औँ मिनेटमा १० खेलाडीमा सीमित बन्यो । भुटानका किन्जाङ तेन्जिङलाई रेफ्रीले रातो कार्ड देखाउँदै बाहिर पठाएका थिए । किन्जाङले नेपालका खेलाडीमाथि फाउल गरेका थिए ।  ७८औँ मिनेटमा नेपालका निराजन धामीले हेडमार्फत गोल गदै बराबरीमा पुर्याएका थिए ।

दोस्रो सेमिफाइनलमा भोलि भारत र बङ्गलादेशबीच प्रतिस्पर्धा हुनेछ । नेपालले फाइनलमा अब बंगलादेश र भारतबीचतको विजेतासँग भिड्नेछ ।