काठमाडौँ – प्रधान सेनापति महारथी अशोक राज सिग्देल नेपाली सेनाका सकलदर्जालाई सम्बोधन गरेका छन् । प्रधान सेनापति सिग्देलले महाशिवरात्रि तथा २६२औँ सेना दिवसको अवसरमा मंगलबार जंगी अड्डामा आयोजित विशेष कार्यक्रममा सम्बोधन गरेका हुन् ।
उनले नेपाली सेनाका बहालवाला तथा अवकाश प्राप्त सकलदर्जा, सेनामा कार्यरत निजामती कर्मचारी एवं परिवारजनलाई शुभकामना समेत व्यक्त गरे ।
सम्बोधनको क्रममा प्रधान सेनापतिले नेपाली सेनाले निर्वाह गर्दै आई रहेका प्रकृति संरक्षण, विपद् व्यवस्थापन, अन्तर्राष्ट्रिय शान्ति स्थापना लगायतका जिम्मेवारीहरू उत्कृष्ट ढङ्गले पुरा गर्दै नेपाली सेनालाई हरेक क्षेत्रमा उत्कृष्ट र अब्बल बनाइराख्न योगदान पुर्याउने सबैलाई धन्यवाद ज्ञापन गरे ।
आजको कार्यक्रममा बलाधिकृत, बलाध्यक्ष, रथीवृन्द, अधिकृत, पदिक तथा अन्यदर्जाको उपस्थिति थियो ।
यस अघि आजै आयोजित बेग्लाबेग्लै कार्यक्रमहरूमा कर्तव्यपालनाको सिलसिलामा जीवन उत्सर्ग गर्ने सैनिकहरूको सम्मानमा प्रधान सेनापतिले छाउनीमा रहेको वीर स्मारक तथा सैनिक मञ्च टुँडिखेलमा रहेको सहिद स्मारकमा श्रद्धासुमन अर्पण गरे ।
यस्तै छाउनीस्थित वीर स्मारकमा आयोजित कार्यक्रममा प्रधान सेनापतिले वीरगति प्राप्त सैनिकका परिवारजनहरूलाई सम्मान समेत गरेका थिए ।