स्वर्गीय गुरुदेव कामतलाई समर्पित ‘ओठको मधुरस’ सार्वजनिक

काठमाडौँ– स्वर्गीय संगीतकार गुरुदेव कामतको स्मृतिमा समर्पित नयाँ गजल ‘ओठको मधुरस’ सार्वजनिक गरिएको छ। गीतकार शंकर अधिकारी घायलको उत्कृष्ट शब्द, गुरुदेव कामतकै सुमधुर संगीत र गायक कृष्ण भट्टराईको सजीव स्वरले सजिएको यो गजल युट्युबमार्फत सार्वजनिक गरिएको हो।

‘ओठको त्यो मधुरस पिलायौ अलिअलि’, जस्ता भावुक पंक्तिहरूले युवावस्थामा आउने उतारचढाव र अनुभूति समेटेका छन्। गीतमा गायक कृष्ण भट्टराईले हार्मोनियम बजाउँदै स्वयं प्रस्तुति दिएका छन्, जसले गजललाई झनै आत्मीय बनाएको छ।

गजलको भिडियोलाई नयाँ सौन्दर्य र सिर्जनात्मकता दिने प्रयास गरिएको छ। भिडियोमा चक्र बहादुर बरालको छायांकन, रोशन भुसालको मेकअप, र राजेश कुमारको सम्पादनले दृश्य पक्षलाई सबल बनाएका छन्।

नृत्य निर्देशनमा राजन महर्जनको कोरियोग्राफी रहेको भिडियोमा समिक्षा भुजेल, कृष्ण भट्टराई, रवि खड्का, राजु पौडेल, सुजन बस्नेत, नवराज अधिकारी, बिक्रम गिरी र जेलिसा कार्कीले अभिनय गरेका छन्। भिडियोको निर्देशन स्वयं गीतकार शंकर अधिकारी घायलले गरेका छन्।

यो गजल कृष्ण भट्टराईको अफिसियल युट्युब च्यानलबाट हेर्न सकिन्छ।