कांग्रेसले उठायो सभामुख डोल प्रसाद अर्यालको भूमिकाप्रति प्रश्न

काठमाडौं – नेपाली कांग्रेसले सभामुख डोल प्रसाद अर्यालको भूमिकाप्रति प्रश्न उठाएको छ ।

बुधबार प्रतिनिधिसभा बैठकमा कांग्रेसका सांसद चन्द्र मोहन यादवले संसदमा सभामुखको भूमिका पक्षपातपूर्ण रहेको बताएका हुन् ।

उनले यसअघि सभामुख आवद्ध रहेको पार्टी रास्वपासंगको सम्बन्धको नाभी काट्न सक्या छैन कि क्या हो ? भन्दै प्रश्न गरेका छन् । सीमाका बिषयमा प्रधानमन्त्रीको अभिव्यक्तिप्रति आपत्ति जनाउदै बिपक्षी दलले निरन्तर विरोध गर्दा पनि सभामुखले कुनै चासो नदिएको उनको भनाइ छ ।

 उनले जनताको आशा र विश्वासलाई कमजोर बनाउने काम सदनमा भएको उल्लेख गरेका छन् । सभामुखले सम्पूर्ण सांसदहरुको अभिभावक बनेर सदनको सम्मान बढाउन सक्नुपर्ने उनले बताएका छन् ।

सांसद यादवले सभामुखको भूमिकामाथि प्रश्न उठाएपछि रास्वपाका सांसद गणेश कार्कीले नियमापत्ति गरेका थिए। त्यसपछि सभामुख डोल प्रसाद अर्यालले सांसद यादवले राखेको अभिव्यक्तिप्रति आफ्नो ध्यानाकर्षण भएको भन्दै नियमावलीको ख्याल गर्न निर्देशन दिएका छन् ।

सीमाका बिषयमा प्रधानमन्त्रीको अभिव्यक्ति रेकर्डबाट हटाउनुपर्ने माग राख्दै कांग्रेस लगाएत बिपक्षी दलले निरन्तर सदनमा विरोध गरिरहेका छन् ।