लोक सेवा आयोगले सार्‍यो लिखित परीक्षा, अब साउन २३ गतेदेखि सञ्चालन हुने

काठमाडौं- लोक सेवा आयोगले तराई–मधेशका केही जिल्लामा उत्पन्न असहज सुरक्षा तथा सामाजिक परिस्थितिलाई ध्यानमा राख्दै लिखित परीक्षाको मिति र समय संशोधन गरेको छ।

आयोगको परीक्षा सञ्चालन शाखाले शुक्रबार सूचना जारी गर्दै यसअघि साउन १६ गतेदेखि सञ्चालन हुने तय गरिएको लिखित परीक्षा अब साउन २३ गतेदेखि सञ्चालन हुने जानकारी दिएको हो।

आयोगका अनुसार पछिल्लो समय तराईका केही जिल्लामा विकसित परिस्थितिका कारण परीक्षार्थी, परीक्षा केन्द्र तथा परीक्षा सञ्चालनमा संलग्न जनशक्तिको सुरक्षालाई मध्यनजर गर्दै परीक्षा तालिका परिमार्जन गरिएको हो।

संशोधित तालिकाअनुसार परीक्षाका अन्य प्रक्रिया आयोगले सार्वजनिक गर्ने नयाँ कार्यतालिकाअनुसार सञ्चालन हुने जनाइएको छ। आयोगले परीक्षार्थीहरूलाई संशोधित मिति र समयसम्बन्धी सूचना आयोगको आधिकारिक माध्यमबाट नियमित रूपमा हेर्न पनि आग्रह गरेको छ।

लोक सेवा आयोगले परीक्षाको निष्पक्ष, व्यवस्थित र सुरक्षित सञ्चालनलाई प्राथमिकतामा राखेर निर्णय गरिएको स्पष्ट गर्दै परीक्षार्थीलाई पर्न गएको असुविधाप्रति क्षमायाचना समेत गरेको छ। साथै, परीक्षार्थीहरूलाई नयाँ तालिकाअनुसार तयारी गर्न र आयोगबाट जारी हुने थप सूचनामा ध्यान दिन अनुरोध गरेको छ।