भोटेकोशी–त्रिशूलीको बहाव घट्यो, अझै उच्च सतर्कता अपनाउन आग्रह

काठमाडौं – रसुवाको भोटेकोशीमा हिजो (भदौ १० गते) आएको विनाशकारी बाढीपछि नदीको बहाव घट्दै गए पनि जोखिम पूर्ण रूपमा टरेको छैन।

जल तथा मौसम विज्ञान विभागले भोटेकोशी र त्रिशूली नदीमा हाल बहाव सतर्कता तहभन्दा तल रहेकाले पनि तटीय क्षेत्रका नागरिकलाई उच्च सतर्कता अपनाउन आग्रह गरेको छ।

आज बिहानको मापन अनुसार कोशी, नारायणी, बागमती, कर्णाली, महाकाली तथा तिनका प्रमुख सहायक नदीहरूको बहाव पनि सतर्कता तहभन्दा तल रहेको विभागले जनाएको छ।

यस्तै कन्काई, कमला, बबई, पूर्वी राप्ती र पश्चिम राप्ती नदीको जलसतह पनि हाल सतर्कता सीमाभन्दा तल रहेको छ। तर वर्षा पुनः हुन सक्ने सम्भावनालाई मध्यनजर गर्दै नदी किनार, बाढी प्रभावित बस्ती र कमजोर भूभागमा अनावश्यक आवतजावत नगर्न तथा स्थानीय प्रशासनका सूचना पालना गर्न विभागले आग्रह गरेको छ।