हिमालयन शेर्पा क्लबलाई यति एयरको मुख्य प्रायोजन

काठमाडौं – ‘ए’ डिभिजन क्लब हिमालयन शेर्पालाई यति एयरलाइन्सले प्रायोजन सहयोग गरेको छ । क्लबलाई शहिद स्मारक ‘ए’ डिभिजन लिग खेल्नका लागि यति एयरलाइन्सले प्रायोजन नविकरण सहित सम्झौता गरेको हो । क्लबलाई एयरलाइन्सले प्रायोजन गरेको यो तेस्रो वर्ष हो ।

सोमबार आयोजित कार्यक्रमबीच हिमालयन शेर्पा क्लबका अध्यक्ष कर्माछिरिङ शेर्पा र यति एयरलाइन्सका सेल्स एन्ड मार्केटिङ डाइरेक्टर सरलसम्शेर राणाले सम्झौतापत्रमा हस्ताक्षर गरेका छन् ।

एक वर्षको लागि गरिएको सम्झौता अनुसार यति एयरलाइन्सले क्लबलाई २० लाख रुपैयाँ उपलब्ध गराउनेछ । क्लबले यति हिमालयन शेर्पा क्लबको नाममा फुटबल खेल्नेछ । यति एयरलाइन्सको सहयोगले क्लबको फुटबल स्तर सुधार गर्न सहयोग मिलेको क्लबका अध्यक्ष एवं अखिल नेपाल फुटबल संघ (एन्फा) का अध्यक्ष समेत रहेका कर्माछिरिङ शेर्पाले बताए ।

गतवर्षको लिगमा सातौं स्थानमा रहेको क्लबले यसपटक शीर्ष चारमा रहने दावी गरेको छ । हिमालयन शेर्पाले मंगलबार नेपाल पुलिस क्लबसँग खेल्दै लिगको सुरुवात गर्नेछ । क्लबको यसबर्षको बजेट ८० देखि ९० लाख रुपैयाँ रहेको बताईएको छ ।