जापानको अमिटी स्पोर्ट्स क्लबसँग नेपाल ५–० गोलले पराजित

काठमाडौँ– एएफसी एसियन कप अन्तर्गत छनोट चरणको तेस्रो खेलको तयारीका लागि जापान पुगेको नेपाली टोलीले बिहीबार खेलेको खेलमा अमिटी स्पोर्ट्स क्लबसँग ५–० को हार व्येहोरेको छ । अमिटी जापानको पाँचौ श्रेणीको लिग कान्साई सकर लिगमा खेल्ने टोली हो ।

दोस्रो रोजाइका खेलाडी उतारेको नेपाली टोलीले पहिलो हाफमा ३ र दोस्रो मा २ गोल खाएको थियो । बुधबार क्वान्साई गाकुइनलाई २–१ले पराजित गर्दाको टोलीबाट पहिलो रोजाइका सबै खेलाडी परिवर्तन गरिएको थियो ।

पहिलो खेलमा नेपालले गाम्बा ओसाका को यू २३ टोलीसँग १–१ को बराबरी खेलेको थियो । नेपाली टोलीले शुक्रबार हनान विश्वविद्यालयसँग मैत्रीपूर्ण खेल खेल्नेछ ।

नेपालले एएफसी एसियन कपको छनोट चरण अन्तर्गत तेस्रो खेलमा ताजिकिस्तानको सामना गर्दैछ । नेपाल र ताजिकिस्तानको खेल आगामी भदौ २० गते काठमाडौँमा हुँदैछ ।