काठमाडौ । सिमसिम पानी परिरहेका बेला शनिबार गाडी चढेर पशुपतिनाथ मन्दिर परिसर पुगेका पारस शाह सरसफाइ कार्यक्रममा सरिक भएका थिए।
सरसफाइ अभियान सञ्चालन गरिरहेका केपी खनालको निम्तो स्वीकारेर पूर्वयुवराज शाह पशुपतिनाथ मन्दिर पुगेका हुन्।
सुरूमा खनालले नै पारसलाई स्वागत गरे। माला लगाइदिए। त्यसपछि उनले शाहलाई धेरैपटक कोशिस गरेर सरसफाइ कार्यक्रमसम्म ल्याउन पाएको बताए।
‘हामी हर्षित छौं, पशुपतिको आँगन हेर्न पूर्वयुवराज आउनुभयो,’ खनालले भने, ‘हामी पढ्न छाडेर सरसफाइ अभियानमा जुटिरहेका छौं। सरसफाइका लागि पूर्वयुवराजलाई सडकमा ल्याउनु लाज हो।’
उनले मातृभूमिलाई बचाउनुपर्ने समय रहेको पनि बताए। ‘मातृभूमिलाई बचाउनुपर्ने समय छ। लड्नका लागि झाडु छ। बाटो होइन मनको सफाइका लागि झाडु लगाउनुपर्ने छ,’ खनालले भने।
लगत्तै खनालले झाडु र पन्जा ल्याए। पन्जा लगाउन शाहलाई अनुरोध गरे पनि उनले मानेनन्। ‘पर्दैन, पर्दैन,’ शाहले भने। त्यसपछि उनले झाडु लिएर सरसफाइ सुरू गरेका थिए। उपस्थित सहभागीले ताली पिटेर स्वागत गरे। शाहले ल स्टार्ट, स्टार्ट भन्दै सरसफाइ सुरूवात गरेका थिए।