साउदी अरबबाट आएका थिए भोजपुरका संक्रमित युवक

विराटनगर — भोजपुरको हतुवागढी गाउँपालिका ६–लङ्खाका २६ वर्षीय एक युवकमा बिहीबार  कोरोना भाइरसको संक्रमण देखिएको छ । संक्रमित युवक साउदी अरबबाट फागुन ३० गते हिमालयन एयरलाइन्सको उडानबाट काठमाडौं फर्केका थिए ।

काठमाडौं ओर्लेर उनी काठमाडौं–हिले चल्ने माइक्रो बसबाट धरान आएर चतरा हुँदै उदयपुरको बेलका नगरपालिका–७ मैनामैनीस्थित ससुराली घर आएर चैत ११ गतेसम्म बसेको हतुवागढी–६ का वडाध्यक्ष सागर राईले बताए । मैनामैनीबाट मोटरसाइकलमा चैत ११ गते नै लङ्खा आइपुगेको राईले थपे । संक्रमितका ससुरालीका व्यक्तिहरु पनि जोखिममा छन् । ‘कोरोना भाइरसको संक्रमण पुष्टि भएसँगै वडामा त्रास फैलिएको छ,’ उनले भने, ‘लङ्खा टोल र वडा नम्बर ६ लाई सिल गरिएको र सबैलाई सामाजिक दूरी कायम गरेर बस्न लगाएका छौं ।’