नेपाल आइडलले दियो प्रतिस्पर्धीको दाबेदारी खारेज गर्नसक्ने चेतावनी

काठमाडौँ– सार्वाधिक रुचाइएको गायन रियालिटी शो नेपाल आइडलको उत्कृष्ट चारको छनोट भइसक्दा विशेष जाती, क्षेत्र वा समुदायलाई आधार मानेर भोट गर्नेे वा माग्ने प्रवृत्ति मौलाएको छ ।

जातीयता र क्षेत्रियतालाई आधार मानेर भोट माग्ने प्रणालीले नेपाल आइडल कुनै जाती वा क्षेत्र विशेषको प्रतियोगिता बन्ने पो हो कि भनेर यतिबेला सामाजिक सञ्जालमा चर्चा परिचर्चा चल्न थालेको छ ।

तर जे होस् यस बिषयमा नेपाल आइडलले मुख खोलेको छ । आफु वा आफ्नो मान्छे छानिँदा ठिक र अर्को छनोट हुँदा बेठिक भनी दुष्प्रचार नगर्न आग्रह गर्दै नेपाल आइडलले त्यसो गरेमा प्रतिस्पर्धीको दाबेदारी समेत खारेज गर्ने सम्मको चेतावनी दएको छ ।

नेपाल आइडलले आफ्नो फेसबुक पेजमा भनेको छ, ‘नेपाल आइडल एक अन्तराष्ट्रिय शो हो, यसको आफ्नै नियम र तरिका हुन्छ । अरू पर्दा ठीक, आफु पर्दा बेठीक र आफ्नो जात, धर्म अनि समुदायको हुँदा ठीक, अरूको हुँदा बेठीक भनि यसको दुष्प्रचार गरेर यसमा रहेका देशकै आईडलहरुलाई एक समुदाय वा एक जातीमामात्र सीमित गर्ने अधिकार कसैलाई छैन । यदि कुनै प्रतियोगि वा प्रतियोगिको सम्बन्धित कसैले त्यस्तो गरेमा सो प्रतियोगिताबाट दाबेदारी खारेज हुनसक्छ ।’

नेपाल आइडलको गरिमालाई कुनै एक जाती वा समुदायमा नखुम्च्याउन आइडलले अनुरोध गरेको छ । कसैको सनक वा अरण्ड्य रोदनको भरमा नेपालका लागि भनेर यसको फरमेट र तोकेको नियम परिवर्तन गर्न नसकिने भन्दै आइडलले शो लाई विवादित बनाउँदै जाँदा प्रतियोगिलाई असर परेमा पीडाको भागीदार को बन्ने ? भनि प्रश्न गरेको छ ।

नेपाल आइडलमा कुनै जाती वा समुदायका आधारमा नभई राम्रो प्रतियोगीलाई छनोट गर्न नेपाल आइडलले आग्रह गरेको छ । बिहीबार उत्कृष्ट तीनका लागि प्रतिस्पर्धा हुँदैछ ।