यी ६ जिल्ला जहाँ कोरोना संक्रमित छैनन्

काठमाडौँ – नेपालमा कोरोना संक्रमण मुक्त हुने जिल्लाको संख्या ६ पुगेको छ । यी बाहेक कूल ७७ मध्ये ७१ जिल्लामा हाल कोरोनाका सक्रिय संक्रमित रहेका छन् ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार प्रदेश नं. १ को सोलुखुम्बु, ताप्लेजुङ, गण्डकी प्रदेशको मुस्ताङ र कर्णाली प्रदेशका मुगु, डोल्पा र हुम्लाका कुनैपनि व्यक्तिमा अहिले कोरोना संक्रमण छैन ।

यस्तै १२ वटा जिल्लामा ५ सयभन्दा बढी सक्रिय संक्रमित रहेका छन् । जसमध्ये मोरङ, सुनसरी, धनुषा, पर्सा, बारा, महोत्तरी, रौतहट, सर्लाही, काठमाडौँ, ललितपुर, चितवन र रुपन्देही रहेका छन् ।

हाल १४१ जना संक्रमित आइसीयूमा उपचाररत छन् भने १७ जनाको भेन्टिलेटरमा उपचार भइरहेको छ । गत २४ घण्टामा थप ९१७ जना कोरोना जितेर घर फर्किएका छन् । यससँगै कारोना निको हुनेको संख्या २४ हजार २०७ पुगेको हो ।

यस्तै गत २४ घण्टामा १ हजार २२८ जना नयाँ संक्रमित थपिएका छन् । यससँगै कूल संक्रमितको संख्या ४२ हजार ८७७ पुगेको छ ।