आफुभन्दा कनिष्ठलाई प्रमुख बनाएको झोकमा आयुक्त डा. जोशीद्वारा राजीनामा

काठमाडौँ– राष्ट्रपति विद्यादेवी भण्डारीसमक्ष अख्तियार दुरुपयोग अनुसन्धान आयोगका आयुक्त डा. गणेशराज जोशीले नेपालको संविधानबमोजिम आजदेखि लागू हुने गरी आयुक्त पदबाट राजीनामा दिएका छन् । भर्खरै आयोगको प्रमुख आयुक्तमा नियुक्त भएका प्रेमकुमार राईको मातहतमा बसेर आफु काम गर्न नसक्ने कारण देखाउँदै उनले राजीनामा दिएका हुन् ।

उनले संविधानको धारा २३८ को उपधारा (४) को खण्ड (क) बमोजिम लिखित राजीनामा दिनुभएको राष्ट्रपतिको कार्यालयका प्रवक्ता जगनाथ पन्तले आज विज्ञप्तिमार्फत जानकारी दिएका छन् ।

वि.सं २०७१ मा अख्तियारको आयुक्तमा पद ग्रहण गरेका जोशीले आउदो चैत्र १९ गते अवकाश लिदैँ थिए । आफ्नो कार्यकाल सकिन २ महिना मात्रै भएको समयमा उनले राजीनामा दिएका हुन् ।रासस