भोजपुर– ढलको उचित व्यवस्थापन नहुँदा भोजपुर बजार क्षेत्रको पूर्व तर्फको भाग दुगन्धित बनेको छ । सेफ्टिट्याङ्कीको उचित व्यवस्थापनमा स्थानीय बजारवासीले बेवास्ता गरेपछि बाटोमा हिँड्ने बटुवा, विद्यार्थी र दलितबस्तीलाई ढलको दुर्गन्धले सास्ती दिएको हो ।
ADVERTISEMENT
भोजपुर नगरपालिका– ७ र ९ का करीब ५० घरबाट निस्कने उक्त ढल बगेपछि स्थानीय दलितबस्तीलाई दुर्गन्धित बनाएको छ । मानव स्वास्थ्यमा गम्भीर असर पुग्ने ढलको दुर्गन्धले दैनिक जीवनयापन गर्न समस्या भएको स्थानीयवासीको गुनासो छ । दुर्गन्धका कारण घरमा बस्न सकिने अवस्था नरहेको र दुर्गन्धले घरबन्द गर्नुपर्ने अवस्था भएको भन्दै स्थानियवासी गोविन्द सुन्दास भन्छन्; ‘स्थानीय बजारवासीको लापवाहीका कारण बगेको ढलको दुर्गन्धमा कति बस्ने, कसैले चासो नै दिँदैनन् ।’
ADVERTISEMENT
एक घर एक सेफ्टिट्याङ्कीको अवधारणा अनुरुप सेफ्टिट्याङेकी राख्नुपर्ने भए पनि उक्त ५० घरको ढल एउटै सेफ्टिट्याङ्कीमा मिसाइएको छ । उक्त साँधुरो सामूहिक सेफ्टिट्याङ्कीमा जम्मा भएको फोहर पानी र दूषित वस्तु भरिएर खोल्सा हुँदै बग्न थालेपछि दुर्गन्धित बनेको हो । दुर्गन्धले सार्वजनिक पैदलबाटोमा हिँड्ने विद्यार्थी र बटुवालाई झन सास्ती दिएको छ । नाक थुनेर पनि बसि नसक्ने अवस्थाले स्वास्थ्यमा गम्भिर असर पुग्ने स्थानीयवासीको भनाई छ ।
उक्त बगिरहेको दुर्गन्धित ढल व्यवस्थापनका लागि निवेदन गरिए पनि कुनै पहल नभएको त्यहाँका स्थानीयवासी रञ्जित राईले सुनाए । उनी भन्छन्; ‘हामीले दुर्गन्ध फैलाइरहेको ढल व्यवस्थापनको विषयमा नगरपालिकामा निवेदन गरेता पनि कुनै ठोस प्रतिक्रिया आएको छैन । ढल उपभोक्ता समितिलाई पनि बोलाएर स्थलगत अध्ययन गर्दा पनि उनीहरुले वास्तै गरेनन् । अनि अहिले यस्तो अवस्था भोग्न बाध्य भएका छौँ ।’
यता नगरपालिकाले भने स्थानीय बजारवासीकै लापारवाहीका कारण दुर्गन्धको स्थिति पैदा भएको जनाएको छ । बजारवासीलाई ‘एक घर एक सेफ्टिट्याकी’ बनाउन प्रतिबद्धताका गराई दुईवर्ष अघि खुला दिशामुक्त नगर घोषणा गर्ने अभियानमा सहयोग पुर्याउन नगरपालिकाले सामूहिक सेफ्टिट्याकीं बनाउन सहयोग गरेको थियो ।
सो घोषणा अभियानपछि पनि स्थानीयवासीले आ–आफ्नो सेफ्टिट्याङ्की बनाउन अटेरीपन देखाएपछि यो समस्या आएको नगरपालिकाका प्रमुख कैलाशकुमार आलेको भनाई छ। उनी भन्छन्; ‘हामीले पहिल्यै प्रतिबद्धता गरायौँ । तर अहिलेसम्म एउटा सेफ्टिट्याङ्की बनाएको छैन । भएको उक्त सामूहिक सेफ्टिट्याङ्कीको पनि सदुपयोग नगर्दा दुर्गन्ध फैलिएको छ । ढल उपभोक्ता समितिकै कमजोरी छ ।’
अर्कातर्फ, यता ढल उपभोक्ता समितिले ढल व्यवस्थापनमा नगरपालिकाले वास्ता नगरेको बताएको छ । यस विषयमा बोल्दै उपभोक्ता समितिका सदस्य रामचन्द्र श्रेष्ठले भने; ‘हामीले तत्कालका लागि एक घर एक सेफ्टिट्याङ्की बनाउन नसकेपछि ढलको समस्या लिएर हामी पटकपटक नगरपालिका धायौँ । तर कुनै प्रतिक्रिया आएन । हामी पनि यो समस्या भोग्न बाध्य छौँ ।’ रासस
