नुवाकोट– नुवाकोट उद्योग वाणिज्य सङ्घले विदुर नगरपालिका २ स्थित वनदेवी मन्दिर परिसरमा निर्माण गरेको ‘भूकम्प स्मारक स्तम्भ’को उद्घाटन गरिएको छ । विसं २०७२ वैशाख १२ को भूकम्पको कम्पन र त्यसको पराकम्पनबाट नुवाकोटमा ज्यान गुमाएका व्यक्तिको स्मृतिमा सो निर्माण गरिएको हो ।
ADVERTISEMENT
स्मारक उद्घाटनको कार्यक्रममा उद्घाटन गर्दै प्रमुख जिल्ला अधिकारी झंकनाथ ढकालले बिहीबार भूकम्पको कारण नभई मानवीय कमजोर संरचनाको कारण जनधनको क्षति पुग्ने भएकाले भूकम्पपछिको पुनःनिर्माण तथा अब बन्ने संरचना मापदण्डअनुसार विपद् प्रतिरोधि बनाउन आग्रह गरेका छन् ।
ADVERTISEMENT
भूकम्पपछिको पुनःनिर्माणमा केही लापरवाही भएको तथा पुनःनिर्माणपश्चात् घरलाई पुनः कोठा र तला थपेर जोखिम बनाइएको बताउँदै उनल भने; ‘आफ्नो ज्यान र सम्पत्तिको सुरक्षाका लागी लापरवाही नभई सजगता अपनाउनुपर्छ ।’
स्मारक स्तम्भ निर्माणको लागि आर्थिक सहयोग उपलब्ध गराएको कार्यक्रममा गोयन्का समूहका व्यवस्थापक अजय गोयन्काले व्यवसायका साथसाथै सामाजिक उत्तरदायित्व बहनको क्रममा भूकम्पमा परेर ज्यान गुमाएका व्यक्तिको स्मृतिमा स्मारक निर्माण गरेर सहयोग पुर्याएको बताएका छन्।
दुई वर्षअघि शिलान्यास गरिएको सो स्तम्भ गोयन्का समूहको रु १० लाख लगानीमा निर्माण सम्पन्न गरिएको हो । स्तम्भ निर्माणको समन्वय तथा जिम्मेवारी बहन गरेको नुवाकोट उद्योग वाणिज्य सङ्घका अध्यक्ष ताराबहादुर कार्कीले व्यवसायी नाफाको लागि मात्र नभई सामाजिक उत्तरदायित्व, मानवीय पीडाको समयमा सहयोगीको रुपमा सहानुभूति समेत राख्न सकिने सन्देश दिएको दाबी गरे ।
भूकम्पमा परेर नुवाकोटमा एक हजार ११२ ले ज्यान गुमाएका थिए, भने एक हजार ५० घाइते भएका थिए । असी हजारभन्दा बढी निजी आवाससहित जिल्लाका सबै (४५३ वटा) विद्यालय, स्वास्थ्य संस्था, सरकारी तथा सामुदायिक भवनमा क्षति पुगेको थियो । रासस
