काठमाडौँ– नेपाल कम्युनिष्ट पार्टी (नेकपा) ओली पक्षका राष्ट्रिय युवा संघ नेपालले साइबर सेना गठन सञ्चालन गर्ने निर्णय गरेको छ । सरकार र पार्टी नेतृत्वविरुद्ध सिण्डिकेट खडा गरेर भ्रम छर्न थालिएको भन्दै संघले सो भ्रम चिर्नका निमित्त साइबर सेनाको युनिट सञ्चालन गर्ने निर्णय गरेको हो ।
ADVERTISEMENT
काठमाडौँमा शनिवार आयोजित संघको दोस्रो केन्द्रिय कमिटिको कार्यक्रममा संघका अध्यक्ष बचनबहादुर सिंहले मुलुकको स्वाधीनता र जनआन्दोलनबाट प्राप्त उपलब्धिको रक्षा गर्न पार्टीका सबै कमिटीमा साइबर सेना बनाउने जानकारी दिएका हुन् ।
ADVERTISEMENT
कार्यक्रममा उनले मुलुकको स्वाधीनता तथा जनआन्दोलनबाट प्राप्त उपलब्धिको रक्षा गर्न सबै कमिटीमा साइबर सेना बनाउन थालिएको बताएका थिए । यसअघि तत्कालीन नेकपा (एमाले)को युवा सङ्घले युथ फोर्स गठन गरेको थियो । बैठकले सरकारले गरेको लोकप्रिय काम र असाधारण उपलब्धिलाई जनताबीचमा पुर्याउन सङ्घका नेता कार्यकतालाई विशेष अभियानका साथ परिचालन गर्ने निर्णय गरेको छ ।
त्यस्तै, बैठकले विदेशबाट स्वदेश फर्किएका र स्वदेशमा रहेका युवा जनशक्ति राज्यको नीति तथा कार्यक्रममा पूर्णरूपमा जोडिन नसकेको भन्दै संविधानमा उल्लेख गरिएको युवा हक अधिकार र सरकारद्वारा घोषित युवामैत्री नीति कार्यक्रमलाई पूर्णतः युवाले सदुपयोग गर्न वातावरण मिलाउन सरकारसँग माग गरेको छ ।
बैठकले सरकारले आगामी वैशाख १७ र २७ गते घोषणा गरिएको प्रतिनिधिसभा निर्वाचनमा क्रियाशील हुन सबै कमिटीलाई निर्देशन दिएको अध्यक्ष सिंहले जानकारी दिएका छन् ।
यसैगरि, सङ्घले चैत मसान्तभित्र पाँच लाख सदस्यता समेत विस्तार गर्ने भएको छ । गत माघ २५ र २६ गते भएको दोस्रो केन्द्रीय कमिटी बैठकले गरेका निर्णय सार्वजनिक गर्न शनिबार यहाँ आयोजित पत्रकार सम्मेलनमा सङ्घका नवनिर्वाचित अध्यक्ष सिंहले ‘जहाँ युवा त्यहाँ राष्ट्रिय युवा सङ्घ’ भन्ने मान्यता अनुरूप चैत मसान्तभित्र पाँच लाख सदस्य विस्तार गर्ने जनाएका हुन् ।
उनले चैतमसान्तभित्र ७७ वटा जिल्ला कमिटी, १६५ वटा सङ्घीय निर्वाचन क्षेत्र समन्वय कमिटी, ३३० प्रदेश निर्वाचन क्षेत्र समन्वय कमिटी, ७५३ स्थानीय तह कमिटी र छ हजार ७४३ वडा कमिटी गठन गर्ने समेत जानकारी दिएका छन् ।
