बैसाखदेखि थप ४ वटा बिजुली बस चलाउँदै सुन्दर यातायात

काठमाडौँ – ट्रलीबस अन्त्यपछि बिजुली बसको पुरागमन गरेको निजी क्षेत्रको सुन्दर यातायात प्रालिले बस थप गर्ने भएको छ । बैसाखभित्रबाट थप ४ वटा बस चलाउने गरी कम्पनीले तयारी गरेको हो ।

बस खरिदका लागि चिनियाँ कम्पनी बीएकेलाई सुन्दरले प्रस्ताव पठाएकोमा कम्पनीले बस पठाउने तयारी गरेको सुन्दरका अध्यक्ष भेषबहादुर थापाले बताए । बैसाखमा बस आउने र बैसाखबाटै बस चलाउने तयारी गरिएको जानकारी उनले दिए ।

सुन्दरले हाल काठमाडौँ उपत्यकामा ४ वटा बिजुली बस चलाइरहेको छ । २०७६ भदौ अन्तिम सातादेखि सुन्दरले बस सञ्चालन गरेको थियो । थप २५ वटा बस खरिदको तयारी गरेको सुन्दरले कोरोनाका कारण बस थप्न सकेको थिएन । अब २५ बस खरिदको प्रक्रिया अघि बढिसकेको र त्यसअन्तर्गत नै थप ४ वटा बस चलाउन लागिएको थापाले बताए ।