राजनीतिक दलहरूलाई ज्ञापनपत्र बुझाउँदै बार

काठमाडौं – नेपाल बार एसोसियसनले आज (सोमबार) राजनीतिक दलहरूलाई ज्ञापनपत्र बुझाउँदै । नेपाल बार एसोसियसन लगातार  प्रधानन्यायाधीश चोलेन्द्र शमशेर जबराको राजीनामाको माग गर्दै आएको  छ । सोही क्रममा बारका महासचिव लीलामणि पौडेलले, संसद्मा रहेका सबै राजनीतिक दलहरूलाई ज्ञापनपत्र एवं ध्यानाकर्षण पत्र दिन लागेको बताएका छन् ।

त्यस्तै, मुलुकभरका अदालतहरूमा कानुन व्यवसायीले कालोपट्टिसहित धर्ना र विरोध कार्यक्रमलाई निरन्तरता दिइने उनले जानकारी दिए। उनका अनुसार सोमबार बिहान १० देखि १२ बजेसम्म विरोधसभा गरिने भएको छ।

बारकी उपाध्यक्ष रक्षा बश्यालले प्रधानन्यायाधीश जबराको राजीनामा माग गर्नुको कारण उल्लेख गर्दै राजनीतिक दलहरूलाई सोको जानकारी दिन ज्ञापनपत्र बुझाउन लागिएको बताइन् । उनले भनिन्, ‘प्रधानन्यायाधीश विरुद्ध किन आन्दोलन गर्नु परेको हो  र हाम्रा मागहरू के हुन् ? कसरी न्यायालयमा सुधार ल्याउन सकिन्छ ? भन्ने विषय ज्ञापनपत्रमा समेटिएको छ।’

बारले मंगलबार विरोध कार्यक्रमअन्तर्गत हदम्याद गुज्रने अवस्थाको अन्तिम म्यादबाहेकको मुद्दा दर्ता नगर्ने र नगराउने निर्णय गरेको छ। अदालतका साथै न्यायाधीकरणहरूमा फिराद, प्रतिउत्तर, पुनरावेदन, रिट, लिखित जवाफ, बहस नोटलगायत केही पनि दर्ता नहुने उपाध्यक्ष बस्यालले बताइन्।