बागमती प्रदेश कांग्रेस अधिवेशन : ईन्द्र बानियाँले मागे दोस्रो चरणको मतदानमा मतदातासँग मत

काठमाडौं – नेपाली कांग्रेसको बागमती प्रदेश सभापति पदका लागि पुनः मतदान हुने भएको छ । नेपाली कांग्रेसको १४ औं महाधिवेशनअन्तर्गत बागमती प्रदेशको नेतृत्व चयनका लागि शनिबार भएको मतदानमा कुनै पनि उम्मेदवारले ५१ प्रतिशत मत नपाएपछि दोस्रो चरणको मतदानबाट नेतृत्वको टुंगो लाग्ने भएको हो।

सभापतिका उम्मेदवार मकवानपुरका इन्द्र बानियाँ, नुवाकोटका जगदीश्वर नरसिंह केसी र काठमाडौँका भीमसेनदास प्रधान कसैको पनि बहुमत नआएको हो ।

सभापतिका आकांक्षी इन्द्र बानियाँले दोस्रो चरणको मतदानमा मतदातासँग यसरी मत मागेका छन्:

आदरणीय साथी, जय नेपाल 
नेपाली कांग्रेसको १४ औं महाधिवेशन अन्तर्गत भैरहेको बागमती प्रदेशको अधिवेशनमा नेपाली कांग्रेसको विधानअनुसार पहिलो चरणको निर्वाचनमा सभापति पदमा निर्वाचित हुन आवश्यक ५१ प्रतिशत मत नपुगेका कारण दोस्रो चरणको लागि आज बिहान ११ः३० बजेबाट मतदान शुरु हुने अवगत गराउँदछु । बागमती प्रदेश सभापतिमा मलाई सर्वाधिक मत दिनुभएकोमा आभार व्यक्त गर्दै दोस्रो चरणमा हुने प्रदेश सभापति पदको निर्वाचनमा हजुरहरुको अमूल्य मतको अपेक्षा गर्दछु ।
जय नेपाल 
ईन्द्रबहादुर बानियाँ
(बागमती प्रदेश सभापतिको उम्मेदवार)