वर्षदिन नपुग्दै ‘मेरो डाक्टर’ एपको प्रयोगकर्ता एक लाख नाघ्यो

काठमाडौँ– स्थापनको वर्षदिन नपुग्दै ‘मेरो डाक्टर’ एपको प्रयोगकर्ता एक लाख नाघेको छ । ८ महिनाको छोटो अवधिमै मिदास टेक्नोलोजीको हेल्थकेयर एप ‘मेरो डाक्टर’ डाउनलोड गर्नेको संख्या एक लाख नाघेको हो ।

३५ हजारभन्दा बढी बिरामीहरुलाई सेवा पुर्‍याउँदै आएको ‘मेरो डाक्टर’मा सूचीबद्ध अस्पतालहरुबाट ३ महिनाको अन्तरालमा १० हजारभन्दा बढी अस्पतालको ओ.पी.डी.टिकट बिरामीहरूले आफैँ अस्पतालमा नगई घरबाटै भुक्तानी गरी अस्पतालका सेवा लिन सफल भएका छन् । यसरी घरबाटै अस्पतालको ओ.पी.डी. टिकट लिँदा लाइन लाग्ने झन्झटबाट मुक्ति मिल्नुका साथै समयको पनि बचत भएको अनुभव सेवाग्राहीको अनुभव छ ।

मिदास टेक्नोलोजी, स्वास्थ्य सूचना प्रविधिको क्षेत्रमा एक विश्वसनीय कम्पनी हो । विगत दुई दशकदेखि अस्पतालका सेवालाई डिजिटलाइज्ड गर्ने कार्यमा मिदासले अग्रणी भूमिका खेल्दै आएको छ । कम्पनीले इलेक्ट्रोनिक मेडिकल रेकर्ड (ईएमआर) को आधारमा अस्पताल र स्वास्थ्य संस्थाहरूको व्यवस्थापन पूर्ण रूपमा डिजिटलाइज गर्न प्रविधिको विकास गरेको छ ।

मिदासले देशभरका १ सय ५० भन्दाबढी अस्पतालहरूलाई व्यवस्थापन पद्वतिमा सहयोग गर्दै आएको छ ।