स्थानीय तह निर्वाचनपछि देश विकासको कामले गति लिन्छ : प्रेम आले

काठमाडौं – नेकपा (एकीकृत समाजवादी) का पोलिटब्युरो सदस्य तथा संस्कृति, पर्यटन तथा नागरिक उड्डयनमन्त्री प्रेमबहादुर आलेले स्थानीय तहको निर्वाचन सम्पन्न भएपछि देशभर अधुरा रहेका विकासका कामले पूर्णता पाउने बताएका छन्।

नेकपा (माओवादी केन्द्र) तथा नेकपा (एकीकृत समाजवादी)ले डोटीको जोरायल गाउँपालिकामा आयोजना गरेको चुनावी सभालाई सम्बोधन गर्दै मन्त्री आलेले देश विकास गर्नकै लागि पाँच दलीय गठबन्धन बनेको उल्लेख गरे। स्थानीय तहको निर्वाचनपछि गठबन्धनको सरकारले अधुरा रहेका विकासका कामलाई पूर्णता दिने उनको भनाइ थियो।

‘देश विकास गर्न तथा नागरिकलाई सुख सुविधा दिन पाँच दलीय गठबन्धन गरेका हौं,’ उनले भने, ‘स्थानीय तह निर्वाचनपछि अधुरा काम सम्पन्न गर्न सहज हुनेछ।’ गठबन्धनका उम्मेदवारलाई जिताउनसमेत उनले सबैमा आग्रह गरे।