सरकारको निर्णयप्रति वन उपभोक्ता महासंघ रुष्ट, जलाए नियमावली

काठमाडौँ– सरकारले स्थानीय समुदाय, महिला तथा संघीयता विरोधी वन नियमावलीलाई स्वीकृत गरेर राजपत्र प्रकाशित गरेको भन्दै सामुदायिक वन उपभोक्ता महासंघले नियमावली जलाएका छन् । मंगलबार वन परिसरमा विरोध प्रदर्शन गर्दै उनीहरुले नियमावलीको प्रति जलाएका हुन् ।

उनीहरुले वन नियमावली नीतिगत भ्रष्टाचार बढाउने गरि आएको, सामूदायिक वन सातौ कार्यशाला गोष्ठीको घोषणापत्र विपरित आएको र वन ऐन २०७६ समेत विपरितको भएको भन्दै वन नियमावली खारेज गर्न माग गरेका छन् ।

सामुदायिक वन उपभोक्ता महासंघकी अध्यक्ष भारती पाठकले वन नियमावलीको बिषयमा महासंघले दिदै आएको सुझावको विपरित नियमावली आएको आरोप लगाइन् ।

संविधान बिपरित नियमावली आएको र यसले वन उपभोक्ता समूहको अधिकारलाई कुण्ठित गरेको उनको भनाई छ । उनले सबै अधिकार संघीय सरकारले लिने गरी ल्याएको नियमावली कुनै हालतमा मान्य नहुने स्पष्ट पारिन् ।