चितवन २ का उम्मेदवार उमेश श्रेष्ठले भने, ‘देशको समृद्धि शिक्षित युवाहरूको हातमा छ’

चितवन – चितवन क्षेत्र नम्बर २ का लोकतान्त्रिक वाम गठबन्धनका उम्मेदवार उमेश श्रेष्ठले शिक्षित युवाहरूले देशको समृद्धिको हासिल गर्न सक्ने बताएका छन् । चुनावी अभियानका क्रममा आज इच्छाकामना गाउँपालिका स्थित चुम्लिङ्गटारमा युवा तथा विद्यार्थी भेटघाट कार्यक्रममा पूर्व राज्यमन्त्री समेत रहेका श्रेष्ठले शिक्षाबाट बेरोजगारी अन्त्य गर्न सकिने बताएका हुन् ।

आफू पनि यही शिक्षा क्षेत्रबाट नै स्थापित र सफल भएकोले युवाहरू शिक्षित र उद्यमशील हुनुपर्नेमा उनले जोड दिए । ‘तपाईँहरू शिक्षित हुनुस्। उद्यमशील बन्नुस् । मेहनत गर्नुस् । देशको समृद्धि तपाईंहरूको हातमा छ । त्यसैले एक मिनेट पनि खेर नफाल्नुस्,’ श्रेष्ठले भने । युवाहरूले देशमा उज्यालो ल्याउन सक्ने भन्दै युवा नै देशको मेरुदण्ड रहेको बताए । देश बनाउने जिम्मेवारी र दायित्व युवाको भए पनि दैनिक दुई हजारको हाराहारीमा युवाहरू विदेशिनुपर्ने दुःखद विषय भएको उनले बताए ।

‘देशको जनसङ्ख्याको अधिकांश उत्पादनशील, उद्यमशील युवाहरू हुनुहुन्छ । तपाईँहरूले आफूले जीवन खेर फाल्नु हुँदैन । स्वदेशमै केही गर्नुपर्छ,’ श्रेष्ठले भने । युवाहरूले स्वरोजगार र आत्मनिर्भर बन्ने काम गर्नुपर्ने भन्दै उनले युवाको रोजगारीको लागि लोकतान्त्रिक वाम गठबन्धनलाई मत दिएर जिताउन आग्रह गरे । ‘युवाहरूले कार्यक्रम ल्याउनुस्, योजना ल्याउनुस् हामी युवाको साथमा छौँ,’ श्रेष्ठले भने ।