दलित महिला लक्षित नेतृत्व विकास तथा उद्घोषण कला सम्बन्धी तीनदिने तालिम सम्पन्न

बिर्तामोड – दलित समुदायका महिलालाई लक्षित नेतृत्व विकास तथा उद्घोषण कला सम्बन्धी तीनदिने तालिम सम्पन्न भएको छ ।

सो कार्यक्रम नारी सञ्चार गृहको आयोजना तथा बिर्तामोड नगरपालिका वडा–१० को सहयोगमा सोमबार सम्पन्न भएको हो ।

तालिमको समापन कार्यक्रममा बोल्दै प्रमुख अतिथि तथा बिर्तामोड नगरपालिका वडा–१० का वडाध्यक्ष दुर्योधन गुरुङले आफ्नो मातहतका क्षेत्र छुवाछुत मुक्त रहेको बताउँदै जात/थरकै आधारमा कसैले पनि आफूलाई कमजोर नठान्न सुझाव दिए ।

केही गर्न सक्छु भन्ने इच्छाशक्ति आफूभित्रै जागृत हुनुपर्नेमा जोड दिंदै उनले सबैले समान रुपमा अघि बढ्न प्रयास गर्नुपर्नेमा जोड दिए ।

सहभागिका तर्फबाट बेबिका कार्की डोली, युनिसा दर्नाल, मुना विक,मनमाया नेपाली लगायतले तालिम उपलब्धीमूलक भएको प्रतिक्रिया दिदैँ आगामी दिनमा पनि दलित महिलालाई अघि बढाउने प्रकृतिका कार्यक्रम ल्याउनु पर्ने बताए ।

कार्यक्रमको दौरान नारी सञ्चार गृह झापाकी अध्यक्ष रेजिना गौतमको अध्यक्षता तथा वडाध्यक्ष गुरुङको प्रमुख आतिथ्यमा सम्पन्न कार्यक्रममा वडासदस्यहरु पृथ्वीबहादुर बस्नेत, धनमाया श्रेष्ठ, दिपिका शिवा, १० वडा महिला सञ्जालककी अध्यक्ष खिलेश्वरी पाण्डे लगायतले शुभकामना दिएका थिए ।

तीन दिनसम्म सञ्चालित तालिमको सहजीकरण नारी सञ्चार गृहकी निवर्तमान अध्यक्ष भिमा शिवाकोटीले गरेकी थिइन् ।