सामान निकासी बन्द गरेर त्रिभुवन भन्सार कार्यालयका कार्गो व्यवसायीहरु आन्दोलित

काठमाडौँ– त्रिभुवन विमानस्थल भन्सार कार्यालयको कार्गो एक्सरे मेशिन बिग्रदा सामान जाँचपास गराउन समस्या भएको भन्दै कार्गो व्यवसायीहरु आन्दोलित भएका छन् ।

कार्गो एक्सरे मेशिन बिग्रेको डेढ महिना हुदा पनि मर्मत वा नयाँ किन्ने काम नभएको भन्दै उनीहरु सामान निकासी बन्द गरेर आन्दोलित भएका हुन् ।

मेशिन बिग्रदा धेरै समस्या भएको र पटक पटक सरोकारवालाहरुलाई ध्यानाकर्षण गराउदा पनि मर्मत नगरिएकाले बाध्य भएर सामान निकासीको काम बन्द गर्नुपरेको कार्गो व्यवसायी खेमराज सुवेदीले जानकारी दिए । सामान निकासी जाँचपाचको क्रममा समस्या भएपनि नेपाल पारावाहन तथा गोदाम लिमिटेड वेवास्ता गरेको उनले बताए ।

एक्सरे मेशिन बनाउन वा नयाँ खरिद गर्न आफुहरुले ध्यानकर्षण गराएपनि बजेट नभएको जवाफ पाएको सुवेदीले जनाए । एक्सरे मेशिन नबनेसम्म कुनै पनि सामान क्लियरिङ नगर्ने र फरवार्डिङ पनि नगर्ने व्यवसायीहरु बताउँछन् ।