त्रुटीहरु संशोधन गर्दै संविधानलाई कार्यान्वयन गर्नुपर्छ : सञ्चारमन्त्री शर्मा

काठमाडौँ– सञ्चार तथा सूचना प्रविधि मन्त्री रेखा शर्माले संविधानलाई पूर्ण बनाएर सफल कार्यान्वयन गर्नुपर्नेमा जोड दिएकी छन् ।

शुक्रबार काठमाडौंमा नेपाल पत्रकार महासंघ ललितपुर शाखाको अधिवेशन उद्घाटन गर्दै मन्त्री शर्माले विगतका भन्दा निकै राम्रो संविधान बनेपनि केहि त्रुटिहरुलाई संशोधन गर्दै संविधानलाई पूर्ण बनाएर सफल कार्यान्वयन गर्नुपर्नेमा जोड दिएकी हुन् ।

उनले संविधानमा उल्लेख मौलिक अधिकार र अन्य धाराहरुमा रहेका व्यवस्थालाई कार्यान्वयन गर्ने अवस्थामा पुगे व्यवस्थाका साथै अवस्था पनि परिवर्तन हुने धारणा राखिन् ।

राजनीतिक नेतृत्व र सञ्चार क्षेत्रले संविधानमा लेखेका कुराहरुलाई व्यवहारमा उर्तान गम्भीरतापूर्वक लाग्नुपर्ने उनको भनाई छ । मन्त्री शर्माले संविधान, व्यवस्था र कानूनका कुरा जनतामा लैजान नसक्दा कार्यान्वयनमा केहि समस्या देखिएको धारणा सुनाइन् । मुलुकको परिवर्तनप्रति देखिएका नकारात्मक भावलाई हटाउन व्यवहारमा सुधार गर्दै जानुपर्ने उनको जिकिर छ ।

शर्माले व्यवस्था सञ्चालन गर्नेको दोष व्यवस्थाले भोग्नु नहुने र गल्ती गर्ने जतिसुकै ठूला मान्छे भएपनि कानूनी दायरामा आउने स्पष्ट पारिन् ।