कर्णाली प्रदेशमा हुने ‘श्रमाधान रोजगार मेला’को तयारी पूरा

काठमाडौँ – कर्णाली प्रदेशको सुर्खेतमा हुने “श्रमाधान रोजगार मेला” को तयारी पूरा भएको छ ।

श्रम, रोजगार तथा सामाजिक सुरक्षा मन्त्रालय, कर्णाली प्रदेश सरकार सुर्खेत र वीरेन्द्रनगर नगरपालिका सुर्खेतको आयोजनामा शुक्रवार देखि सुर्खेतको वीरेन्द्रनगर स्थित सिटी हलमा मेला शुरु हुँदैछ ।

मेलाको विषयमा जानकारी दिन बिहीबार आयोजित पत्रकार सम्मेलनमा बोल्दै मन्त्रालयका फोकल पर्सन उप सचिव टिकाराम ढकालले रोजगारदाता र कामको खोजीमा रहेका श्रमिकको बीच भेट गराउनु मेलाको मुख्य उद्देश्य रहेको बताएका छन् ।

त्यस्तै, नेपाल चेम्बर अर्फ कमर्स कर्णाली प्रदेश अध्यक्ष चिन्तामणि न्यौपानेले नेपालमा दक्ष श्रमिकको अभाव रहेको बताए । रोजगारदाताले आवश्यकता अनुसारको श्रमिक नपाउने अवस्थालाई यस्तो खालको मेलाले सम्बोधन गर्ने उनले बताए ।

त्यस्तै, कमर्सका अध्यक्ष न्यौपानेले नेपाल चेम्बर अफ कसर्मको समन्वयमा ११० जनालाई रोजगारी अवसर प्रदान गरिने बताए । यसै गरी मेला अवधिमा अन्य क्षेत्रमा पनि रोजगारीको अवसर प्रदान हुनेछ ।

श्रम कार्यालय सुर्खेतका कार्यालय प्रमुख श्रीसमशेर रानाले मेलाको तयारी पुरा भएको बताएका छन् । हालसम्म मेलामा ४० वटा निजी क्षेत्रका स्टलहरू रहने छन् । जसमध्ये ३४ वटा स्टलहरू बुक भई सकेको उनले बताए । बेलुकासम्ममा अन्य स्टलहरू पनि बुक हुने अपेक्षा रहेको उनले बताए ।

मेला बिहान १० बजे श्रम देखि बेलुका ६ बजेसम्म सञ्चालन हुनेछ ।