राजेन्द्र लिङदेनले रोष्टममै च्याते बजेट पुस्तिका, भने– ‘पहुँचका भरमा राज्यको स्रोतमाथि खेलबाड गरिदैँछ’

काठमाडौँ– राष्ट्रिय प्रजातन्त्र पार्टीका अध्यक्ष राजेन्द्र लिङ्देनले रोष्टममै भौतिक पूर्वाधार तथा यातायात मन्त्रालय अन्तर्गतको बजेट पुस्तिका च्यातेका छन् ।

मंगलबार विनियोजन विधेयक, २०८१ अन्र्तगत भौतिक पूर्वाधार तथा यातायात मन्त्रालय शीर्षकमाथि खर्च कटौतीको प्रस्ताव प्रस्तुत गर्दै लिङ्देनले बजेट पुस्तिका च्यातेका हुन् । आफु निकै नरम प्रवृतिको मान्छे भएपनि सो मन्त्रालयको बजेट देख्नेबितिकै रिस उठेको उनले बताए ।

लिङ्देनले संसदको हलभित्र रहेका जुनसुकै पार्टीको भएपनि चार वटा निर्वाचन क्षेत्रबाहेकका सांसदहरुको बजेटमाथि आक्रोश नै रहेको बताए । उनले पहँुचका भरमा राज्यको स्रोतमाथि खेलबाड गरेको आरोप लगाए । अहिले बजेट बनाउने मौका पाउदा मन्त्रीहरुले देखाएको गलत कामले अहिलेको व्यवस्थामाथि उठेको आक्रोश सहि पुष्टि हुदै गएको उनको दाबी छ ।

उनले संसदमा रहेका सवै सांसदहरु जनताको मत लिएर आएको भन्दै बजेटको वितरणमा देखिएको पक्षपात उचित नभएको तर्क गरे ।