नयाँ सरकार गठनका लागि सहज वातावरण बनाउन प्रधानमन्त्रीलाई एमालेको अनुरोध

काठमाडौँ– नेकपा एमालेले तत्काल नयाँ सरकार गठनका लागि सहज वातावरण बनाउन प्रधानमन्त्रीलाई अनुरोध गरेका छन् ।

सोमबार प्रतिनिधिसभा बैठकको आकस्मिक समयमा बोल्दै एमालेका सांसद ठाकुर गैरेले मुलक प्राकृतिक प्रकोपको विपत्तीमा परेको भन्दै मुलुकको समस्या समाधानका लागि नयाँ सरकार गठनका लागि सहज वातावरण बनाउन अनुरोध गरेका हुन् ।

उहाले लोकतान्त्रिक शासनमा सरकार अल्पमतमा परेपछि एक सेकेण्डपनि सरकारका बस्ने नैतिक आधार नरहने धारणा राखे । उनले वर्ष शुुरु भएको छोटो समयमा नै ठूलो जनधनको क्षति भएको र जोखिम न्यूनीकरणका लागि प्रभावकारी पहल र व्यवस्थापन हुन नसकेको बताए ।

त्यस्तै अर्का सांसद विद्या भट्टराईले प्राकृतिक प्रकोपबाट मुलुक अस्तव्यस्त हुँदा पनि सरकार कहाँ छ भन्ने प्रश्न उठेको धारणा राखिन् । उनले नागरिकको समस्या समाधानका लागि पनि तत्काल नयाँ सरकार गठन हुनुपर्ने बताइन् ।

त्यस्तै सांसदहरुले बाढी पहिरोमा बेपत्ता भएकाहरूको खोजी, घाइतेको निःशुल्क उपचार, राहत र जोखिमयुक्त स्थानमा रहेका नागरिकलाई सुरक्षित स्थानमा सार्न सरकारको ध्यानाकर्षण गराएका थिए । त्यस्तै उनीहरुले बाढी पहिरोबाट क्षतिग्रस्त संरचनाको पुर्ननिर्माण गर्दै सहज आवतजावतको वातावरण बनाउनुपर्नेमा जोड दिएका छन् ।